Durante e reunion di dia 19 di november 2018, e Comite di Maneho Monetario (CMM)2 di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11,0 porciento y e “advance rate” na 1 porciento, despues di a evalua e datonan economico y monetario mas recien. E siguiente informacion y analisis a wordo considera pa yega na e decision aki, basa riba data di september 2018.
Reservanan internacional
Tanto e reservanan internacional di divisa (+0,7 porciento), cual ta consisti di e divisanan di banconan comercial y BCA, como e reservanan oficial di divisa (+3,1 porciento), esta e divisanan cu ta di BCA so, a registra aumento den september 2018, compara cu december 2017. Consecuentemente, e reservanan internacional di divisa y e reservanan oficial, respectivamente, a yega te na Afl. 1.837,6 miyon y Afl. 1.700,1 miyon na fin di september 2018.
Desaroyonan den credito
E crecemento di credito total den e sector bancario a keda positivo (+2,5 porciento) na september 2018, compara cu december 2017. E desaroyo aki ta principalmente atribui na aumentonan den fiansa pa
construccion di cas.
Inflacion
E promedio anual di inflacion a crece te na 2,3 porciento na september 2018 for di −0,4 porciento na september 2017, principalmente causa door un tasa mas halto di impuesto indirecto desde 1 di juli 2018 y di
un aumento den e componentenan di transporte y cuminda. E promedio di inflacion ora exclui e componentenan di energia y cuminda a yega na 1,2 porciento.
Turismo
Durante e prome shete lunanan di 2018, e desaroyo den e indicadornan di turismo a registra crecemento, ya cu a nota un expansion den e cantidad di bishitantenan (+1,5 porciento), anochinan permaneci (+1,6 porciento), y cantidad di turistanan crucero (+5,8 porciento).
Placa den circulacion
E cantidad di placa den circulacion a registra un subida di Afl. 133,9 miyon te na Afl 4.373,8 miyon den september 2018, compara cu december 2017. Esaki ta debi na un aumento den e activo domestico netto (+Afl. 94,2 miyon) y den e reserva di divisa netto (+Afl. 39,7 miyon, incluyendo e diferencia di revaluacion).
