Promé minister Eugene Rhuggenaath huntu ku minister di Desaroyo Ekónomiko Steven Martina i minister plenipotensiario Anthony Begina a bishita Hans de Boer presidente di VNO-NCW. Esaki ta e organisahon di dunadónan di trabou na Hulanda.
Hans de Boer komo presidente di VNO-NCW riba petishon di premier di Hulanda Mark Rutte a yuda organisá e konferensia ‘Curaçao: Bon Biní open for business’. Hans De Boer a biba hopi aña na Kòrsou i a traha pa gobièrnu di Antia. De Boer ta un ekonomistá ku sa hopi di ekonomia di Kòrsou. For di tempu ku Hans de Boer a biba i traha na Kòrsou e a keda ku un amor imenso pa nos isla. Te ainda e tin un kas akinan.
Awor ku ekonómikamente nos tin nos desafionan, De Boer ta duna sosten pa buska komersiantenan Hulandes ku kier invertí den Kòrsou. E presidente di VNO-NCW ta mira ku tin hopi posibilidat pa komersiantenan uza Kòrsou pa hasi negoshi. E stabilidat polítiko, lasonan di Reino i siguridat hurídiko ta hasi Kòrsou atraktivo pa invershonistanan Hulandes.
Pa honrá su esfuersonan i pa hasi palabrashon e ministernan di Kòrsou a bishita Hans De Boer djarason 20 di yüni. Djaweps (21 di yüni) lo tin e konferensia ‘Curaçao: Bon Biní open for business’ den kua ta enfatisá e posibilidatnan pa miembronan di VNO-NCW pa hasi negoshi na Kòrsou.
