Dialuna mainta tempran autoridadnan a bay na cas di Dichi Lacle Paradera despues di a ricibi diferente yamada di aparentemente bisiñanan.
E denuncianan ta bisa cu e cachonan ta un molester pa e bario y cu e cachonan ta den mal estado. Funcionarionan di Cuerpo Policial compaña pa esnan di City Inspector, hunto cu miembronan di Luna Foundation , a acudi hunto na e adres di Esteban “Dichi” Lacle.
Nan a keda sorprendi. “Nos a pensa di haya un situacion horibel, despues di tur loke nos a scucha eyfo. Pero e cachonan ta den hopi miho estado cu esnan na casnan di famia,” sra. Zoey Conijn di Luna Foundation a bisa.
Dichi a keda sorprendi ora cu el a hay’e cu un cantidad di persona cu schrift den man a yega su cas, pidiendo pa mira e area unda cu e cachonan ta. “Supuestamente e cachonan ta blaf hopi y ta stroba e bisiñanan. Pero boso mes por wak, e cachonan no ta landrando hopi. Nan ta haci esey ora cu un pushi of otro bestia pasa cerca,” Dichi a splica.
Tur e cachonan cu tin na e cas, e doñonan ta trece nan sea pasobra nan no por cuida nan mas of nan ta malo. Pero como cu gasto di Veterinario ta hopi halto, e hendenan no por paga esaki. Nan sa “cu mi ta cuida e animalnan aki bon y nan ta prefera trece nan aki en bes di deshaci di nan,” Dichi a comenta. El a agrega cu ora e cacho ta completamente bon, of bon comi bek, ta busca un doño p’e.
Miembronan di Luna Foundation a haci un inventarisacion di cuanto cacho tin y con nan por yuda Dichi pa acomoda e animalnan aki di miho forma. “Dichi ta cuidando su bestianan. Mi a spera algo horibel, pero e animal ta bon cuida. Nos mes di Luna Foundation tin 50 y pico cacho. E no ta un trabou facil y si bo no tin ayudo, e ta bira dificil. Dichi no sa bisa no y ta cuidando nan di e miho forma cu e por. No mester lubida cu e ta costa placa y tempo,” sra. Conijn a bisa. Berdad, el a agrega, cu no tin mucho luga pa nan core, pero nan ta bon cuida.
Tin hende ta trece cachonan pa un tempo, pero ta tarda pa busca nan bek of no ta bolbe mas. Y Dichi semper ta busca un solucion.
Dichi mas ta un persona cu ta stima animal y a bisa na final cu e ta spera cu tur e organisacionnan yud’e haya un miho espacio pa e sigui cuida di e cachonan, malo y esnan cu no kier nan animalnan mas.
