Ludo King: E wega di momento durante “Lockdown”

Na januari ultimo, a download e wega aki 300 miyon biaha, cu 6 miyon hende hungand’e tur dia y 75 miyon diferente hende hungand’e den un luna. Cada usuario ta gasta mas o menos 45 minuut hungando e wega aki, cu pa nos na Aruba, ta un version moderno di “Mens erger je niet”. Pero na luna di maart y april, cu tur hende cera den cas debi na Coronavirus, a haci un interes pa descarga (download) e wega den celular a surpasa tur expectativa!

Ludo King ta un wega interactivo via un aplicacion cu mester descarga riba Bo celular of tablet. E compania Gametion Technologies di India a desaroy’e y ta disponibel riba plataformanan conoci manera iOS, Android, Kindle y Windows Phone. E wega riba su mes ta un version moderno di e wega di mesa “Ludo” cu ta procedente di “Pachisi” un wega bieu di India.

Pachisi ta un wega hopi bieu mes di India. No ta conoci exactamente ki aña a desaroy’e pero ta data den siglo 16 of mas bieu. Ta describi’e como e wega nacional di India. Ta yam’e tambe “Binticinco” cu ta e cifra maximo cu por a logra cana cu e douw di e tempo aya. Awendia ta hung’e cu 1 douw cu tin e cifra 6 como esun mas halto. Ta specula cu Pachisi mes a deriva di un wega Chines.

Reglanan di Ludo King

Obhetivo di e wega ta pa move 4 token di e punto di salida y yega cas bek. E prome hungado pa yega cu tur 4 token den su cas bek a gana! E wega tin 4 modulo; Bo por hunga contra e computer, por hunga moda local, online multiplayer hungando cu ptro hungado rond mundo y Private Multiplayer, den cual Bo ta invita amigonan pa hunga cu Bo.

A lansa e prome version di Ludo King dia 20 di februari 2016 riba Apple Store y ta aparece como #1 den e seccion di Top Games.

Mens Erger je Niet

Ta bon pa menciona cu e wega Mens Erger Je Niet di Hulanda ta deriva tambe di Pachisi di India cu despues a bira conoci na Inglatera na 1896 como Ludo. Desaroyador di Mensch ärgere Dich nicht ta Joseph Schmidt di Alemania y a saca e wega aki na 1914. E wega a dura 20 aña pa yega Hulanda, pues e compania “Jumbo” a lans’e na Hulanda den idioma Hulandes na aña 1934.

E aplicacion Ludo King riba celular a mira un crecemento impresionante di entre 50-75% durante e Lockdown debi na Covid-19, specialmente na India, unda a desaroya e wega interactivo aki. Entre 25 di maart pa 10 di april 2020 e tabata den Top 5 di e aplicacionnan mas descarga na India, cu no menos di 9.5 miyon “downloads”. Na cuminsamento di februari tabata descarga e aplicacion di Ludo King pa un total di 150 mil biaha. E number ey a crece te na 450 mil riba dia 13 di april 2020. Entretanto a descarga e mesun wega aki 330 miyon biaha caba y conoce no menos di 50 miyon diferente hungado pa dia!

Noticia relacionaMas for di e autor