Parlamentario di fraccion di AVP, sra Lorna Varlack Jansen, ta mustra cu riba tereno di enseñansa, por a tuma nota cu tur e lidernan di e diferente partido tawata di acuerdo cu Papiamento mester drenta nos enseñansa.
“Prome cu esaki bira realidad mester aproba e Ley di ortografia di Papiamento prome. Parlamento ta den espera di e contestanan di gobierno riba e preguntanan y despues di reces, e ley aki lo wordo trata.
Aprobacion di e Ley aki lo ta un otro logro di Gobernacion di AVP y e ta un logro grandi pa Aruba mirando cuanto aña el a dura prome cu nos por a yega asina leu.
Den preparacion pa cu introduccion di Papiamento den Scol Basico ya caba a introduci e ‘pilot proyect’ di scolnan multilingual. Lo haci uzo di e experiencia di e scolnan cu a participa na e proyecto aki pa sigui introduci esaki na un manera responsabel na otro scolnan.
E introduccion di Papiamento lo tin su retonan y e ta un proceso cu mester wordo guia profundamente.
Hopi politico ta zwaai cu ideanan manera nan tin un ‘toverstok’ pero e realidad ta cu e preparacion y e introduccion por tuma hopi tempo y cu tur e maestronan mester ta riba e mesun liña.
Maestronan lo mester wordo educa riba e ortografia y gramatica. Mayornan y nos comunidad en general mester wordo educa riba esaki pa domina Papiamento den un forma corecto. Metodonan mester wordo traduci y material mester wordo adapta.
E ta facil pa expresa cierto idea pa cu enseñansa, pero mester splica pueblo corectamente riba e procesonan y e fondonan rekeri pa logra esaki.
Hopi di e plannan pa enseñansa pa loke trata programanan di otro partido ya caba ta den ehecucion y durante e siguiente gobernacion lo amplia y of mehora loke a wordo haci caba.
Introduccion di Papiamento como idioma di instruccion
Ya gobierno a duna atencion pa nos muchanan special cu scol nobo na Brazil pa VSO y cuido di muchanan den crèche, caminda e ley a wordo aproba pa regla esaki y hisa e calidad.
Na mes momento mester crea oportunidad pa maestronan desaroya nan mes sea pa medio di IPA y e diferente curso cu docentenan a haya y tambe crea oportunidad y inversion den material digital.
Mehora y revisa e curiculo di cada tipo di scol cu e Curiculo nacional, y inverti den infrastructura den scolnan cu a keda bashi como monumento, manera Prins Bernard School, John F Kennedy y e dependence di ex Martin Luther King School pa cual tambe tin e plannan ya formula.
Scolnan saludabel tambe ta in place caminda e ley di Enseñansa Obligatorio tambe a wordo aproba y ta trahando riba e mehoracion di control di esaki pa asina sigura un miho control cu muchanan ta bay scol pa nan preparacion y formacion.
Cada un desaroyo den enseñansa semper lo tin e espacio di mehoracion pasobra enseñansa ta algo dinamico y semper lo conoce innovacion.
Gabinete Mike Eman I y II a pone hopi atencion riba enseñansa. Ta keda na cada un pa gara e oportunidadnan y pa ta habri y consciente di tur cu a wordo haci e ultimo añanan, Parlamenario Lorna Varlack Jansen ta mustra.
