Recientemente St. Fundacion Facilidadnan Deportivo, FFD a re-instala e tres postenan di lus na Piscina Olimpico Roly Bisslik na Savaneta. Despues di un periodo cu esakinan wordo renoba a instala tur tres poste pa asina e usuarionan por haci uso di e piscina den oranan di anochi.
Awor a yega turno na piscina mes pa haya un renobacion despues cu na comienso di aña, esnan concerni cu ayudo di expertonan di WEB Aruba NV a hasi un estudio riba e awa den piscina y a nota cu tin algun trabou tin cu wordo hasi pa por garantisa cu e calidad ta uno optimal, uno di nivel cu ta cuadra cu tur e normanan stipula. Director di F.F.D, Ing. Junior Tromp a splica un poco mas di e trabounan cu lo inicia pronto. “Actualmente e estado di e pomp y awa den e piscina no ta esun mas miho. Den e caso specifico aki, Lotto a duna su contribucion pa asina e renobacion di e sistema tuma lugar pa loke ta e awa, pomp, ect. Tur esaki na benificio di e usuarionan di e piscina manera e diferente clubnan di landamento sin lubida e schoolzwemmen. Den e caso aki a aserca un compania cu a prepara e bestek riba e “assesment report” di WEB NV y a base di esey tabata tin un tender cu a tuma lugar. A sinta cu notario unda a prepara un aanbesteding y aki a haya e diferente ofertanan di e companianan local cu tabata interesa den hasi e trabou na e Piscina Olimpico. Un punto di salida den esaki tabata cu Lotto a stress masha hopi riba e transparencia pa loke ta e trabounan cu tin cu wordo ehecuta y door di cua compania.
Notario a traha un rapport di e
aanbesteding y awor e compania cu a traha e bestek of “tender documents” ta evalua loke a
drenta y asina ta duna e evaluacion final na Lotto cu na su turno ta otorga un di e 5 companianan cu a manda nan aanbesteding segun conseho”. E trabou di renonabacion lo bay den cooperacion hunto cu Piscina Olimpico Roly Bisslik. Den e caso aki ta purba di tene e piscina mas largo posibel habri pa no stroba e desaroyo y entrenamento di nos atletanan como tambe e schoolzwemmen. Ora cu no por mas ta percura pa e coneccion nan wordo hasi y pa e trabounan finalisa den mas corto tempo cu ta posibel. Esey ta meta te cu awor aki. Unda bes cu e pool ta cla, e calidad di awa lo ta uno continuo y hopi mas miho. Es mas e machine y pompnan lo funciona den e miho forma, uno mucho mas moderno den comparacion cu esun actual, e lo yuda gasta menos coriente. E awa actual mes lo wordo recycle mientras e trabou lo dura 5 luna pèro esaki ta bay den diferente fase. Mester bisa cu pa awor esaki lo bira e prome parti di renobacion y mas despues tin pensa pa inicia cu mas trabou manera un warm-up pool cual ta algo hopi nesecario sigur pa competencianan interncional unda e ta un exigencia. Tin pensa di traha un warm-up pool cu tambe e deportenan di waterpolo y landamento sincronisa por usa. Awor esnan cu ta praktica e deporte di landamento, landamento sincronisa, waterpolo, triathlon, landamento escolar y lesnan di landamento lo por usa e facilidad den forma mas sigur y hygienico.
