E boto maritimo di Cuerpo Policial Arubano (KPA) ta riba dok y no ta funciona debi na diferente defecto, mientras cu e suma di 1.8 miyon florin cu tabata menciona pa un boto nobo a perde su destino original. Lito Lacle, presidente di Sindicato di Polis Arubano (SPA), ta cuestiona si gobierno mester warda te ora un incidente pasa na haf pa actua.
Lacle a relata cu durante un reunion cera di Parlamento, un miembro di Parlamento di Aruba a bisa cu tabatin 1.8 miyon florin disponibel pa cumpra un boto nobo pa Cuerpo Policial. Sinembargo, despues cu Parlamento a vota e Landsverordening, e suma aki no ta mas destina pa e boto maritimo.
E situacion ta preocupa SPA, pasobra actualmente polis no tin un boto maritimo funcional. Segun Lacle, e boto cu nan tin ta riba dok y tin diferente problema tecnico. E ta alerta cu si un incidente pasa na haf internacional y Aruba no por responde manera mester, esaki por trece repercusion pa e pais.
“Pero tur esakinan nos tin cu warda pasa pa nos haci algo?”, Lacle a cuestiona, indicando cu SPA tambe tin pregunta pa Gobierno di Aruba tocante e situacion.
Reparacion por costa 100 mil florin
Ora a puntr’e cuanto e reparacion di e boto actual por costa, Lacle a indica cu e suma por ta rond di 100 mil florin. Entre e defectonan cu e boto tin, el a menciona problema cu e motornan, perdida di zeta y un tanki cu ta lek.
Lacle a reconoce cu drecha e boto ta importante den corto plaso, pa polis por bolbe dispone di e recurso maritimo. Pero pa largo plaso, e presidente di SPA ta di opinion cu Aruba mester considera cumpra un boto nobo.
E pregunta principal pa SPA ta con y na ki momento gobierno lo busca un solucion pa e falta di un boto maritimo funcional, prome cu un emergencia obliga e autoridadnan pa actua.
