Sociedad Interamericana de Prensa (SIP), durante su encuentro “Reunion de Medio Año” tumando luga na Medellin, Colombia y cu ta conta cu participacion di Headlines Group (24ora.com) a manda un mensahe fuerte na Gobiernonan di henter e hemisferio Americano, relaciona cu e forma con ta stroba trabou di medionan di comunicacion.
Un di e criticanan mas fuerte tabata relaciona cu asesinato di periodistanan, asina por menciona cu entre aña 2012-2017 a asesina 584 na mundo, di cual Siria, Irak y Mexico ta encabesa e lista.
Tambe a atende cu e Gobiernonan cu ta stroba e trabou diario di medionan di comunicacion. Asina por considera loke ta pasando na Aruba, unda Presidente di Parlamento ta prohibi entrada di prensa pasobra a critica e politico na radio, ta ehempel bibo di stroba trabou periodistico. Es mas, e medio (Headlines Group) mester a bay Corte pa haya razon. Asina mes Parlamento a dicidi di apela e sentencia y a cambia du bufete di abogado y awor lo bringa e caso via e bufete unda e mes ta(bata) traha como abogado, mustrando aki no solamente persecucion politico pero tambe ta habri caminda pa cuestiona e integridad di e politico y e instituto Parlamento di nos pais.
E congreso di SIP, ta conta cu participacion di Headlines Group como e unico cas editorial di Aruba presente entre participantenan di henter e continente Americano. Nos compania y periodistanan ta miembro di e organisacion periodistico aki pa hopi aña caba.
E organisacion “Inter American Press Association” of na Spaño yama “Sociedad Inter Americana de Prensa” ta existi desde aña 1943 y ta representa mayoria medionan di comunicacion den Norte America, Sur America y Caribe, cu mas di 1300 miembro y cu su base situa na Miami.
