Den cuadro di desaroyo strategico di talento y discubri proposito di nos hobennan dia 25 y 26 di maart benidero Biblioteca Nacional Aruba lo bay tin tanto na nos surcusal na Oranjestad, como tambe San Nicolas un lectura titula, “Caracteristicanan di personalidad cu ta yuda studiante alcansa exito.”
Esaki ta specialmente pa mayornan cu ta desea di compronde nan yiunan personalidad y capacidad miho pa asina logra alcansa un enfoke mas rigido pa cu e hoben su capacidad, futuro carera y desaroyo en general.
E lectura ta wordo duna pa Sra. Sharleen Tromp, Docente y Desaroyado di Identidad y Talento certifica kende tin mas cu 13 aña trahando cu hobennan y conoce nan diferente personalidad, habilidad pero tambe curiosidad y e insiguridadnan cu hopi hoben cana cun’e.
“Den transcurso di mi carera como docente y como mama di un hoben adulto, e partnership di mayor y studiante den e hoben su jornada ta keda e fundeshi firme. Ta importante pa e mayor conoce cierto caracteristica di nan yiu cu lo bay yudanan yega na escogencia y decisionnan maconcreto pa cu nan carera, y pa e motibo aki e iniciativa pa inclui e mayornan tambe na e lectura aki,” Tromp ta indica.
E materia ta diseña pa yuda hobennan compronde nan mes miho, nan capacidad y habilidadnan pero tambe ta importante pa e mayor tin un bista mas profundo y concreto di con e caracteristica di nan yiunan ta hinca den otro y con esaki por yuda e hoben yega na decisionnan mas concreto pa cu su futuro desaroyo. Pa mayornan cu ta desea di atende na Biblioteca Nacional Oranjestad, esaki lo tuma luga dia 25 di maart pa 3or di atardi y pa San Nicolas esaki lo bay ta dia 26 di maart pa 3or di atardi.Pa motibo di espacio limita di e sala, ta importante pa registra. Esaki por wordo haci via [email protected] of via whatsapp na 7330377 pa tur dos localidad, Oranjstad y San Nicolas.
