Minister Glenbert Croes mester busca conseho prome cu hisa salario minimo. Esey ta e punto di bista di Camara di Comercio. Segun Ernst Mohamed, nan no ta contra di un aumento di salario. Al contrario, tur hende merece biba bon na Aruba, pero pa haci esaki, e poder di compra mester tey. Si bo ta haci algo cu bo no a investiga of cu bo no a wak kico ta e consecuencia di dje, e por tin su consecuencia negativo.
Camara di Comercio ta un organo di conseho pa e minister di economia, pero tambe pa gobierno y kier puntra nan, si prome cu nan haci algo asina aki, pakico nan no ta wak den nan mesun cas, pa baha e gastonan di gobierno, prome cu hisa un salario minimo.
Por ehempel wak e costonan di awa y coriente, transporte y invoerrechten, ki efecto nan tin riba e salario di un persona cu ta cobra salario minimo.
Tambe nos por mira, mas empleado di Citgo ta bay cas, cu e impacto cu tin riba nos economia, cu no lo bay ta esun cu ta deseabel. E ora eynan tur parti den nos comercio tin cu cuminsa premira y tin cu cuminsa wak kico pa haci pa mira con ta bay compensa pa loke nos ta perdiendo.
Si mira bon, Mohamed ta continua, nos gobierno mester awor aki wordo mira y wordo maneha como un negoshi. Tur CEO cu ta drenta un negoshi, prome cos cu nan ta haci, ta baha nan gasto. Si un negoshi ta perdiendo placa, kico nan ta haci, nan ta wak unda por baha gasto y normalmente ta un cos cu ta empleadonan, nan ta kita.
No ta bisa cu awor aki mester kita tur empleado, pero si bo ta cuminsa wak den bo mesun seno, ken ta overtollig, ken no ta contribui y unda bo por ta mas eficiente, e ora eynan bo ta baha bo gasto, bo ta haci cu bo situacion ta bira mas rendabel y si bo situacion ta mas rendabel, e ora comercio ta bira mas rendabel.
E financiamento door di sector priva pa sector publico, ta bira inalcansabel. E gastonan ta bira mucho halto y nos comerciantenan, a lo largo, na no por mantene esaki mas.
Tambe locual cu kier a bisa ta, cu pa e minister consulta Raad van Advies, SER, ATIA, Camara di Comercio y AHATA cu gratuitamente lo sinta cu e minister, pa hunto traha un plan con por haci esaki un win-win situation. Con por mira si bo kier haci un movecion asina aki, haci’e cu e por bisa cu tur hende tin beneficio di dje. A lo largo, si bo ta bay hisa salario minimo y comercio dicidi hisa prijs, ta unda e spiraal aki ta bay keda. Si bo ta bay haci esey, tin cu haci’e unda cu e comerciantenan no lo bay hisa nan prijs. Esey ta e meta di Camara di Comercio, Mohamed ta finalisa.
