Cada tanto luna tin encuentro cu hefenan di departamento. Esaki ta e prome encuentro cu e gobierno nobo tambe y cu ta importante. Segun Omaira Lares, hefe di e Departamento di Recurso Humano, prome minister a duna su introduccion di maneho di personal pa loke ta su gabinete y tambe di e aparato publico.
Despues a presenta e proyecto cu lo cuminsa y a start caba, cual ta e functiehuis. Henter e descripcion di tur e funcion y baloracion di e funcionnan den e aparato publico.
Trai merdia lo presenta e sistema HRM cu lo bay en bibo. Esey ta e conexion cu tur e departamentonan y hunto lo bay live cun’e. Ta un proyecto di mas di 2 miyon cu a haya financia for di FDA, cual ta conecta tur departamento hunto. Na ultimo, den cuadro di e maneho di integridad cu prome minister ta hiba, tin un curso di responsabilidad pa loke ta directornan di departamento.
Functiehuis
E encuentronan aki ta masha importante. Ademas cu como directornan ta topa cu otro, y ta parti di un organisacion. Tin ora den esferanan informal, bo por combersa y tin un miho contacto cu otro. Bo por regla hopi tambe durante encuentronan informal. P’esey mes DRH ta purba na tin’e dos pa tres biaha pa aña. E biaha aki e tabata riba peticion di prome minister pa organis’e na principio di aña. A agrega algun tema cu pa DRH ta importante tambe. Un di e temanan aki ta functiehuis. Tin diferente departamento cu ta distribui tur e funcionnan y balora nan. Pero e sistema aki ta un sistema cu ya ta vigente di aña 1986 cu nos a bira pais.
Na 1992, tabata tin un proyecto cu yama Bezoldigingsregeling Aruba, pero cada biaha ta cuminsa, e ta stop. Mientras tanto, den sombra, e ultimo tres añanan a cuminsa traha riba formacion di nos mesun hendenan pa bay haci’e. Ta facil pa bay Hulanda pa busca formatieschrijvers, laga nan bin, distribui tur e funcionnan, coy nan caminda bay. Pero Lares ta kere den empodera nos mesun hendenan y pa mantene e calidad di loke tin cu bin despues. Esey ta loke lo bay pasa. Lo bay distribui tur e funcionnan a base di un sistema generalistico. No cu ta funcion uno uno di cada hende, pero funcionnan mara riba e tareanan cu un departamento tin. Y bo ta compara nan cu tur otro.
Claro tin cu bay wordo mara tambe na un structura salarial nobo y esey ta locual cu ta hopi importante. Por distribui funcion. Ta importante pa bo evalua, bo performance management, e opleidingnan, pero loke ta importante pa tur hende ta, kico lo bay ta nan funcion y baloracion nobo.
