Macuarima Spark Elekta ta anota dos careda den bom di 7 pa laga Jay’s Tire den tereno

Campeonato HEINEKEN fast pitch di Aruba Softball Bond dedica na baluartenan Jacobo Jansen y Gilbert “Nando” Maduro a continua riba canchanan na Pos Chiquito.

Den playoff semi final den categoria AA Macuarima Spark Elektra ta rally den bom di 7 inning anotando 2 careda esta pa empata y despues laga Jay’s Tire den tereno pa tuma ventaha di 1-0 den e serie di best out of 3. Ganador di e serie aki lo enfrenta Royal Power den e gran final cual lo bira un serie di 5 wega pa campeon indiscutibel y oficial di Aruba 2019. Jay’s Tire a pika ariba 3-0 den cabez di promer inning pero mesora Macuarima ta reaciona cu 2 careda den bom di promer inning.

Jay’s Tire ta rally pa 4 careda mas den cabez di dos mientras Macuarima ta anota 1 den mesun inning pa hasi e wega 7-3. Den bom di 4 inning Macuarima ta rally riba pitcher Jorge Santana anotando 4 careda pa empata e wega 7-7. Ningun equipo kier a baha cabez pa otro. Jay’s den cabez di 7 ta bay ariba 8-7 faltando 3 out pa celebra nan victoria pero Macuarima a pensa otro y a keda pone precion y ta empata e wega den bom di 7. Cu homber na primera y tercera cu un out riba un rolling pa primera e primera base ta bolter pa segunda buskando un double play pa sera e inning pa forsa extra inning pero no ta concretisa y e coredor na tercera ta anota e careda di victoria lagando Jay’s Tire den tereno. Jay’s Tire como equipo a bati di 27-12 pa un averahe di 444 mientras Macuarima a bay di 24-7 pa un averahe di 292.

Boxscore final Macuarima Spark Elektra 9 careda, 7 hit, 3 error y ta laga 8 coredor na base. Jay’s Tire 8 careda, 12 hit, 2 error y ta laga 9 coredor den circulacion. Mihor bateadornan pa Macuarima ta Jermain Ras di 3-2, Carlos Croes di 1-1, Michael Fingal di 3-2 incluyendo un homerun cu 2 coredor na base den bom di 4 inning impuhando 5 careda cargando Macuarima den e victoria aki y Zefrinthian Kerr a bay di 2-1. Pa Jay’s Tire a destaca na plato Jasin Orman 2-2, Djurwin Croes 4-3 cu dos doblete mas 2 rbi, Artoir Herrera di 3-2 cu 3 careda impuha, Giancarlo Gomez y Egimar Lampe ambos a bay di 2-1. Juan Chirino ta bay completo enfrentando 34 bateador lansando 34 bola, 74 strike pa un total di 108 lansamento permitiendo 8 careda tras di 12 hit ponchando un bateador y ta regala 1 base por bola pa seya asina e victoria riba su nomber.

Jorge Santana Cortina por mira atras riba un gran labor pero mester conforma su mes cu e derota. Jorge a enfrenta 33 bateador y ta lansa 54 bola, 77 strike pa un total di 131 pitch y ta regala 7 hit propinando 5 ponche mientras e ta regala 7 base por bola. Diamars anochi e di dos wega lo tuma lugar y Jay’s Tire mester di un victoria pa empata e serie y forsa un di 3 wega diaranson anochi 8pm na Pos Chiquito. Fanaticada yega tereno bin apoya bo equipo preferi.