Awe hues-komisario a atendé e demanda di kustodia di Ministerio Públiko di ‘Lon’ M. E demanda di Ministerio Públiko a keda otorgá i alabes a suspendé e aresto preventivo di ‘Lon’ M. bou di kondishonnan ekstraordinario. Ministerio Públiko a indiká adelantá ku e no tin opheshon kontra e suspenshon di e e aresto preventivo. E investigashon penal lo sigui, mirando ku e aktonan serio esta instigashon i violensia públiko pa kua ‘Lon’ M. ta sospechoso, te ainda ta bálido.
Riba petishon di Ministerio Públiko, hues-komisario a imponé e siguiente kondishonnan: no kometé otro echo kastigabel i keda ku kontakto obligatorio ku ‘reclassering’. Ku e konsentimentu aki, Ministerio Públiko ke logra yega na e senario kaminda di un banda ta respetá e derechinan di e siudadano, manera e derechi di manifestá i di otro band no ta trese desorden públiko pa motibu di echonan kastigabel. Kada un di nos ta deseá di por selebrá Dia di Bandera tránkil i ku esaki por kana di un forma pasífiko. Ademas Ministerio Públiko ta enfatisá ku ta importante pa nos trata ku rèspèt, tantu ku otro komo ku propiedat di otronan.
‘Lon’ M., tabata un di e kantidat di sospechosonan ku a keda detené durante di un demonstrashon ku a eskalá den área di Fòrti dia 24 di yüni 2020. Di e grupo grandi di sosepchoso ku a keda detené, hues- komisario a disidí ku nan lo permanesé mas largu detené. Ministerio Públiko ta evaluá e ròl di kada sospechoso i basá riba esaki lo disidí si ta demandá kustodia. E siman aki mes lo atendé demandanan aki tambe.
