Riba dia Internashonal di Derecho di Mucha, frakshon di Partido Alternativa Real den Parlamento ta para ketu na e dia importante aki.
Antia Hulandes na aña 1998 a ratifiká e Tratado di Derecho di Mucha i na aña 2010 e Tratado aki a drenta ma vigor pa pais Kòrsou tambe. E Tratado ta preskribí ku tur pais tin ku tuma tur medida na nan alkanse pa realisá e derechinan manera nan ta deskribí den e Tratado.
Frakshon di PAR ta reiterá ku pa mantené un kontrol debido riba e derechonan di mucha komo un totalidat, Kòrsou mester introdusí ‘Kinderombudsman’. Un instansia independiente ku ta vigilá i por evaluá ku derechonan di mucha ta wòrdu salbaguardiá. Ainda Parlamento ta pendiente pa e proposishon di lei di ‘Kinderombudsman’ keda presentá na Parlamento.
Na yüli 2017 un komishon pa derecho di mucha instalá pa Minister Presidènt Rhuggenaath a trese vários rekomendashon dilanti entre otro e nesesidat di un ‘Kinderombudsman’. Den e ámbito di abuso di mucha minister Koeiman a firma i implementá e plan Nashonal kontra abuso di Mucha. Ambos akshon ta demostrá klaramente e kompromiso pa ku e tema aki.
Protekshon di nos muchanan ta inherente na e derechonan humano universal. Kada akshon ku komo nashon ta wòrdu tumá, mester sigurá e bienestar di e mucha i hóben, den kuadro di esaki frakshon lo ripití su petishon na Presidente di Parlamento pa lanta un komishon fiho ku tin komo meta vigilá ku e derecho nan di mucha i hóben ta keda sigurá òf ubiká e punto aki komo punto agènda permanente pa e komishon fiho di Parlamento di Desaroyo Sosial, Labor i Bienestar, teniendo kuenta ku e ministerio di Desaroyo Sosial, Labor i Bienestar tin e ehekushon di e Tratado bou di dje.
