Diadomingo ultimo, a jega su final, e evento mas grandi di deporte na Aruba y alaves e evento number uno di mundo, esta Aruba Beach Tennis Open 2018.
Eagle Beach un biaha mas a keda chikito, cu sigur mas di 4 mil hende riba e anochi final di e torneo aki, a pone un record nobo pa loke ta asistencia.
Despues di a experiencia e wega di mas largo den historia di beach tennis, cual tabata e di dos semi final den categoria masculino, nos por duna inicio na e weganan final riba center court. Den e categoria femenino e ekipo di Italia number 1, alaves campeon mundial 2018, a bai final contra di e ekipo forma pa un brasilera y aleman. Ta trata aki di Federica Bacchetta (2) y Giulia Gasparri (2) contra di Maraike Biglmaier (5) y Rafaella Miiller (5).
Den 2 tremendo set Maraike y Rafaella a bai cu e titulo di campeon pa loke ta categoria PRO Women’s Doubles. Un momento hopi emocional, ora cu despues di e partido Federica Bacchetta, kende ta un idolo den e deporte aki, a anuncia cu esaki tabata si ultimo partido, ya cu e lo stop di pratica esaki.
Pa loke ta categoria masculino, Michele Cappelletti, kende a gana den 2017 hunto cu Luca Carli, a team up cu Alessandro Calbucci pa purba retene su titulo. Nan mester a enfrenta e duo dinamico, di Tomasso Giovannini di Italia y Nikita Burmakin di Russia. Por a wak di comienso cu nan 2 tabata e faboritonan ya cu nan ta a batay pa mas cu 3 ora den nan wega semi final.
Despues di a bataya, Nikita y Tomasso a keda como campeon nan nobo di e Aruba Beach Tennis Open den e categoria masculino. Asina aki tambe, awe Beach Tennis, ta conoce pa prome biaha den historia, un hungador cu no ta di Italia, na prome lugar di e ranking mundial, den nomber di Nikita Tomasso
Asina ey e anochi e termina, cu e ceremonia di entregamento di premio y despues di esaki a sigi cu e after party, cual varios persona ta unicamente bin e torneo aki pa presencia esaki. Nos di Beach Tennis Aruba kier a gradici cada un di nos sponsornan, cada un cu a participa, cada un cu a bin wak e weganan y asina aki aporta pa a hasi e evento aki uno sumamente exitoso
