Konseho Sosial Ekonómiko (SER) tabata tin djaweps 21 di yüni 2018 un enkuentro bilateral ku e mishon di Nashonnan Uní den kuadro di e asina yamá Mainstreaming Acceleration Policy Support (MAPS).
MAPS, ku ta fundá i kordiná pa Nashonnan Uní, tin komo meta prinsipal pa desaroyá un roadmap pa implementá di un manera efektivo i efisiente e métanan di desaroyo duradero (Stragic Development Goals, SDG’s) pa Kòrsou. E SDG’S-nan a ser adoptá na 2015 dor di asamblea general di Nashonnan Uní, kaminda Reino Ulandes ta miembro.
Durante e enkuentro ku SER, e delegashon a tene un presentashon riba e SDG’s-nan i e trayekto di MAPS, kaminda a fokus riba e manera kon SER, komo órgano di konseho di legisladó (gobièrnu i parlamento), ta pará pa ku temanan sosio-ekonómiko aktual na Kòrsou. A papia riba e ròl ku SER ta hunga den e kuadro aki i ki papel e kolegio konsultativo aki, basá riba e posishon independiente ku e tin den nos konstelashon estatal, lo por hunga den konsehá gobièrnu riba implementashon di e SDG’s-nan.
SER, den kua tin representashon sindikal, empresarial i ekspertonan independiente, a mustra riba aspektonan sosio-ekonómiko aktual na Kòrsou ku ta rekerí atenshon inmediato, manera konekshon entre enseñansa i merkado laboral, e stagnashon ekonómiko ku ta perdurando i komo konsekuensia di esaki desaroyonan riba merkado laboral.
Tambe a elaborá riba e tema di inovashon i kiko ta e posibel rekesitonan pa por yega na un desaroyo ekonómiko ekilibrá i duradero na Kòrsou. Mas aleu a papia riba e eksperensia ku e delegashon di Nashonnan Uní tin ku otro paisnan ku un karakter insular, manera Kòrsou, i e ròl ku órganonan similar na SER a i ta hunga den kuadro di konsehá riba implementashon di e SDG’s-nan.
E enkuentro bilateral a terminá ku e palabrashon ku SER lo bai deliberá den su propio seno di ki manera lo e por hunga un ròl di importansia pa konsehá riba implementashon di e SDG’s-nan.
