Diahuebs, dia 4 di februari Koningin Wilhelmina Fonds (KWF) ta recorda e hecho di su fundacion 60 aña pasa na Aruba y tabata un grupo di dama cu a forma e prome directiva.
Segun Lilian Prince, presidente actual di e fundacion, a splica cu e prome directiva a consisti di Irma Brauer-Beaujon como presidente. Despues tabata e secretaria, den persona di Alix de Veer-Henriquez y como tesorera, Dorothea Dennert-Tauber, tur den feliz memoria.
Tin cu recorda nan pasobra e hecho aki ta algo hopi grandi y e ta bay den historia aki na Aruba como e fundacion cu aworaki ta celebrando 60 aña di existencia.
Un hecho cu tin cu grandici e Ser Supremo, cu awe e fundacion ta funcionando manera mester ta. E realidad ta cu ya e tin mas di 70 aña ta existi den Reino Hulandes. Un fundacion lanta en realidad na Hulanda, na momento cu na 1949, Reina Wilhelmina, na momento cu a anuncia cu ta bay abdica y pasa e corona pa su yiu muhe prinses Juliana. Pueblo Hulandes den Reino a cuminsa ta tene un colecta. Ora cu a yega e momento, La Reina a bisa nan cu loke a recauda, pon’e den un fundacion y cuminsa traha pa pashentnan cu cancer.
Den historia di medicina, por bay bek cu mas di 1500 aña prome cu Cristo, ya caba e malesa aki ta existi. E ta un malesa hopi bieu, pero ta impacta bida di cualkier ser humano, ora cu e bati na bo porta.
Di un of otro forma ta sinti’e. E consuelo grandi ta, cu por tin alivio, tin dokter pa duna e asistencia y si tin mester, tin un fundacion pa cual por bati porta.
KWF ta gradici Dios na prome luga pa e forsa durante e 60 añanan aki, cu no tabata facil. Ta gradici tambe e comunidad Arubano.
E comunidad cu a sa di aporta y ta sigur cu lo sigui aporta na e fundacion aki, mirando e hecho tur loke cu e fundacion aki ta haci den e comunidad Arubano.
Awendia no solamente cu e fundacion ta yuda e pashentnan cu ta opera di cancer na pecho, cu nan ta haya nan protesis y nan brassiere.
Tin e hecho tambe cu awor aki ta dunando e transporte di cas pa departamento di oncologia. Ta duna e transporte di cas pa Imsan, unda ta duna radioterapia.
Den pasado cu tabata duna e pasashi na e di dos acompañante, pero aworaki tin cambio. Tin cu mira con ta bay adapta. Tin e hecho cu, unda cu e gasto di mas grandi ta bay na e asistencia na cas pa e pashent terminal.
Esaki ta subiendo dia pa dia, pero tin confiansa den Dios y confiansa den e comunidad Arubano cu KWF lo sigui traha na bienestar di e pashentnan y pa Aruba henter.
