Pa e último añanan kada bes na kuminsamentu di aña eskolar nos ta eksperensia e mesun problemanan un tras di otro. Sea ku unifòrmnan no a bin kla, no tin material pa duna lès òf transporte eskolar no a ser regla di kual sa bin dilanti tambe ku shofùrnan no a haña nan pago, material di skol no a yega na tempu i tur otro punto di atenshon ku ta surgi. Ta parse ku nos no ta siña for di nos erornan i kada biaha e mes un situashon ta presentá. Antisipando riba esaki i sperando ku e biaha aki si kosnan kana manera mester ta i sin problema i mirando ku falta dos siman pa aña eskolar nobo kuminsá Parlamentario pa frakshon di MAN sr Wimbert Hato hasi algun pregunta na Minister di OWCS i Minister di SOAW:
Minister por garantisá ku transporte eskolar ta regla i ku lo no tin problema ku esaki na komienso di e aña eskolar?
Materialnan nesesario pa duna lès ta regla kaba?
Kura di skol, edifisionan kaminda ta duna lès tur a ser kontrolá i prepará pa evitá kualke kontra tempu?
Kon ta para ku e asuntu di unifòrmnan di skolnan?
Supsidio ku mayornan sa haña pa kubri gastunan di unifòrm i material di skol ta regla?
Frakshon di partido MAN ta deseá pa e aña eskolar aki si por kuminsá sin e problemanan tradishonal ku tur aña sigur e último seis añanan nos ta haña nos konfrontá kuné. Nos ke pa nos muchanan i mayornan kuminsá un aña eskolar dushi sin problema. Nos ta spera ku e ministernan konserní atendé e puntonan di preokupashonnan di nos frakshon i ta spera kontesta riba nos preguntanan
