Despues di hopi aña e klok di Kerki Protestant situa den Wilhelminastraat, a zona atrobe. E biaha aki tabata pa un ceremonia special di casamento.
Despues di un restauracion, porfin a logra bati klok di e Kerki. Miembro activo di e directiva di Kerki, Sergio Tromp, a splica cu e dia aki tabata uno hopi special, debi cu for di basta tempo caba no por a bati e klok di e Kerki pa motibo cu un tempo e tabata daña y mester a drech’e.
Awo, despues di hopi tempo, a bati e klok durante di un casamento. Sigur esaki tabata un ceremonia special. Segun Tromp, un dominee, cu a bin Aruba specialmente pa e ocasion aki, a bendiciona e casamento. Actualmente Kerki no tin un dominee y ta buscando uno nobo. Ta un Kerki cu ta data for di principio di siglo 19. Tromp a relata cu tin dos toren. Esun mas chikito ta e prome kerki protestant di Aruba.
E ta data di 1846. A uz’e pa mas di 100 aña. Te cu 1950 a traha e kerki nobo. Awo e tin mas di 70 aña, cual te dia di awe ta haciendo uzo di dje.Segun Tromp den e Kerki semper tin un pijporgel. Esey ta un orgel cu pipa largo cu ta saca un zonido special. Pa hopi aña Kerki tabata e unico cu tabatin’e.
Despues e misa di Brazil tambe a haya uno.Kerki Protestant ta un di e prome iglesianan na Aruba, segun Tromp. Bayendo un tiki den historia, si bay wak entre e edificionan di mas bieu di Aruba, e prome tabata Fort Zoutman y despues e di dos y di tres na Aruba, ta e Kerki Protestant bieu. E otro ta e cas bieu di pastoor di Santa Cruz.
Kerki Protestant ta un monumento oficial y ta riba e lista di Monumentenzorg.Tromp a bisa por ultimo cu nan ta masha contento cu tur cos a bay bon y cu e bruid a bay masha bunita mes, como tambe e sirbishi. Awo, cu e restauracion di e klok di Kerki ta completa, actividadnan sigur na Kerki lo ta mas hopi.
