E ultimo simannan Kiwanis Club of Aruba tabata activo cu ehecucion di diferente proyecto, unda cu e miembronan a demostra cu di curason nan mision ta pa haci un impacto den e bida di e muchanan na Aruba. Un di e proyectonan aki ta “Smile Makers” cu a duna oportunidad na un grupo di 20 mucha di diferente districto di Aruba pa haci nan checkup dental, a yena e djentenan cu buraco y tambe a haya limpiesa dental completamente gratis na Helmeyer Dental Clinic di dentista Yelitza Domacassé Helmeyer, cu ta miembro di Kiwanis Club of Aruba.
Diasabra mainta e muchanan a wordo ricibi pa e team di Helmeyer Dental Clinic miembronan y president di Kiwanis Club of Aruba. E muchanan tabata hopi contento y entusiasma. Un pa un nan tabata wordo yama pa haci nan checkup dental mientras e otro muchanan tabata warda nan turno, nan por a wak e pelicula di “Finding Nemo”.
E muchanan a ricibi tipnan valioso riba nan cuido dental caminda enfasis ta wordo poni riba e importancia di e higiena dental.
Na final di e dia e muchanan tabata smile cu un sonrisa saludabel. Tambe e muchanan a ricibi un “goodie bag” yena cu articulo manera; pasta di djente, skeiro di djente, un buki di pinta cu ta contene informacion di con pa cuida e djente, un etui cu pen, potlood, gum, lineal, stickers, cos di hunga, pan y juice.
Kiwanis ta un organisacion global di boluntario dedica na mehora mundo via un mucha y via di un comunidad cada biaha y tin como lema: sirbi e muchanan di mundo. Kiwanis Club of Aruba ta activo den e comunidad Arubano desde 1964. Pa mas informacion di Kiwanis Club of Aruba y of su actividadnan por acudi na www.kiwansclubofaruba.org of Facebook page Kiwanis Club of Aruba.
