Pa di 6 aña consecutivo e tres clubnan di Kiwanis na Aruba, esta Kiwanis Club of Aruba, Kiwanis Club of Palm Beach y Kiwanis Club of Young Professionals Aruba, a uni forsa diasabra ultimo pa asina realisa e proyecto di “Back 2 School”. E aña aki un total di 99 mucha a ricibi ayudo cu nan articulonan pa cuminsa e aña escolar nobo.
Kiwanis tin como meta pa sirbi y contribui na e muchanan den nos comunidad. Cada mucha a ricibi un tas yena cu articulo di scol manera: pen, potlood, schrift, gum, lineal, etc. E proyecto aki a cubri tanto uniform como tambe jeans, keds, mea y paña interior. E muchanan a ricibi tambe un corte di cabey, cortesia di Maggy’s y Next Level Babrbershop, pa asina cuminsa e aña escolar yen style.
Despues di a haci nan compra hunto cu e miembronan di Kiwanis na Geekay, e muchanan a bay Neptali Park caminda nan a disfruta di un dia yena cu actividad y atraccion di e park como tambe di figura di blaas y Tattoo door e personal di E-Z Party Solutions. Pa cuminda di merdia e muchanan a ricibi chicken wings cortesia di Urataka Center y pizza. E muchanan a keda hopi contento cu e paña, uniform y nan tas yena cu articulo pa asina cuminsa un aña escolar nobo. E dia tabata uno exitoso mirando e sonrisa riba e cara di e muchanan.
Kiwanis kier gradici Atlas Accountancy, Aruba Aloe, Bright Bakery, CMB, Compra, E-Z Party Solutions and Rentals, Fruteria Virgilio, Geekay, Maggy’s, HBN Law, Next Level Barbershop, PLUS Accountants, Red Cross Aruba, Satex Agencies N.V., The Palm Tours, The Ritz Carlton Aruba, Tropicana Aruba Resort & Casino y Urataka Center pa nan contribucion na e Proyecto aki. Alabes e clubnan di Kiwanis na Aruba kier a desea nos muchanan un exitoso aña escolar 2018-2019 yena cu hopi energia, bendicion y sabiduria.
