Minister mr. Andin Bikker a kibra e silencio relaciona cu suspension di Errol Zebeda for di su funcion den Cuerpo Policial Aruba. E politico encarga cu maneho di husticia riba nos pais ta malcontento cu e forma con Zebeda a gaña. A puntr’e na mas di un ocasion pa bestel uniform nobo pa e departamento di Warda nos Costa cu legalmente ta resorta bou di Cuerpo Policial Aruba ainda. El a sigura cu e pedido a bay caba. A resulta despues cu e no a papia berdad y mas ainda, a bay na e compania pa pidi nan pa yud’e bisa cu el a haci pedido caba. Minister Andin Bikker a bisa cu den media a sali mas motibo cu e no sa di nan ainda. E por confirma cu su decision, te awor, ta mara na falta di seriedad y suministra informacion robes cu consecuencia cu un departamento ta haye cu reto pa ekipo y uniform pa por funciona debidamente.
