E siman aki ta sali den medionan di komunikashon ku lo tin 10 pashènt di diálisis
aktualmente na Colombia pa dialisá. Na mesun momento tin e sentro di diálisis CDC
Curaçao Dialyse Centre ku a bin ta operá aki na Kòrsou for di 2006 dialisadó
pashèntnan lokal i turistanan ku ta bishita nos isla, ku ta wardando pa nan pèrmit. Ta
asina ku CDC a muda di Klipstraat pa e edifisio nobo kaminda ántes tabata Marlboro
kompletamente renová ku un “state of the art “ pa un sentro di diálisis. Segun un
investigashon ku mi a hasi e instituto aki si tin kapasidat pa dialisá e pashèntnan aki
mes ya ku nan tin 4 stul pa dialisá ku no ta wòrdu usa. Mirando esaki e problema na
mi humilde opinion aktualmente na Kòrsou no ta dor di falta di stulnan pa dialisá. E
situashon aki no solamente ta trese mas kosto pa SVB, ya ku pa dialisá un pashènt,
COMEVA ta kobra mas ku 15 mil florin pa luna, sin kòrda e gastunan adishonal di
estadia di e pashèntnan aki( mirando ku ya kaba su fondonan ta Bou di preshon). Pero
p’ami e parti mas importante ta e parti humano i sosial di e pashèntnan aki ku ta sufri
na momento ku nan mester bandoná nan pais i nan famia, den e situashon ya kaba
delikado di nan malesa. Hopi di e pashèntnan aki ta ta personanan ya di edat avansá,
ku netamente pa esaki mester tene kuenta dòbel kuné na momento mandánan den
eksterior pa dialisá sin sa ki dia nan ta regresá bek. Bo ta mira famianan ta wòrdu
ranka for di otro pa motibu di e situashon aki. Hopi historia di pashèntnan den
eksterior ku ta totalmente isolá dor ku famianan no por ta ku nan pa motibu di trabou i
situashon sosial.
Den kuadro di esaki mi ta hasi uso di mi derecho i deber komo Parlamentario segun
art. 96 e sigiente pregunta nan na Minister di Salubridat I Medio Ambiente
sra.Camelia-Römer:
1.Ta bèrdat tin pashènt tin na Colombia aktualmente ta dialisá ?2.Kuantu pashènt ta
dialisá na Colombia aktualmente?
3.Kuantu tempu kaba kada unu di nan dialisadó na Colombia?
4.Kuantu sèn esaki ta kosta pa luna pa dialisá pa pashènt i kiko ta e kosto di estadia di
e pashènt i famia?
5.Minister ta na altura ku na CDC ,si tin kapasidat?
6.Minister ta na altura ku ainda CDC no a haña su pèrmit despues di a muda for di
Klipstraat i ku ya ta wardando kasi un aña pa esaki?
7.Minister ta na altura di e nivel di kuido ku tin den e sentro aki pa nos hendenan?
8.Minister sa ta Kiko ta e motibu ku ainda CDC no a haña su pèrmit nobo pa operá
despues di nan mudansa for di Klipstraat?
9.Minister ta altura ku e situashon aki por trese ku CDC por sera su portanan ,lagando
90 pashènt i 46 personal riba kaya?
