Mientras cu comunidad internacional ta apoya e Presidente autoproclama Juan Guaido, varios otro pais y tambe periodistanan, no ta reconoce esaki. Tin hasta a bisa cu e posicion cu e presidente di Asamblea Nacional a tuma, ta ilegal, mirando cu loke e ta hustifica for di e Constitucion, esta articulo 333, no ta cuadra.
E ta bisa cu te ora cu un Presidente fayece of e tuma su retiro, e ora e presidente di Asamblea Nacional por tuma mando.
Pero en todo caso, e paisnan cu tin hopi mas influencia a hiba palabra y ta apoya Guaido. Naturalmente, nan ta opone Maduro y un sanger fresco, cu ta boga pa democracia, sigur a cay den bon tera pa nan.
Pero esey ta lo de menos. Tin varios incidente cu a tuma luga durante di e tres dianan aki, cuminsando cu e mortonan.
Ya tin 14 morto
Durante e tres dia di protesta contra e gobierno di NicolasMaduro, a laga 14 persona asesina na Venezuela. Segun Provea y Observatorio Venezolano di Conflictividad Social, “e totalidad di e mortonan aki a produci door di impacto di bala, den contexto cu e agentenan di e Forsa Publico y gruponan paramilitar, a actua den trabou di represion di protestanan pacifico”, segun NTN24.
Barinas a acumula e mayor registro di mortonan cu 4 morto, tur a sosode durante e protestanan realisa diaranson, despues die convocatorio haci pa e Asamblea Nacional.
Despues ta sigui e estadonan Tachira y Distrito Capital cu 3 morto cada un; Amazonas y Bolivar cu 2 morto confirma y finalmente Portuguesa, cu 1 morto confirma.
Un total di 13 di e victimanan tabata di sexo masculino y un di sexo femenino. Edad di e victimanan ta varia entre 19 pa 47 aña di edad.
E morto di e 14 Venezolanonan aki ta eleva na 229, total di e mortonan den protestanan desde cu Nicolas Maduro a asumi poder na aña 2013.
Segun Provea, desde April di e aña ey te cu awo, a wordo reitera e uzo disproporciona di forsa di parti di e funcionarionan.
Mas di 200 persona deteni
E ONG Foro Penal, a indica cu 218 persona a wordo deteni durante e protestanan contra Nicolas Maduro den e ultimo tres dianan.
Atrabes di su cuenta riba Twitter, e ta detaya cu dialuna, dia 21 di Januari, a tuma luga 9 aresto, 34 aresto diamars y diaranson 23 di januari, 175 persona a keda aresta.
Tambe, Foro Penal a aclarea cu e cifra maneha te cu 12’or di anochi di diahuebs, solamente ta inclui casonan completamente confirma pa e organisacion.
Maduro a enfrenta pa di tres dia consecutivo protesta di ciudadanonan di comunidadnan popular di Caracas, antes considera bastionnan di Chavismo.
Segun Provea, solamente den e parti west y centro di Caracas a registra por lo menos 50 manifestacion y cifra indetermina den e resto di e pais.
Tur protesta a wordo reprimi di parti di e forsanan di siguridad di Estado y hopi di nan a wordo ataca pa colectivonan arma.
Posibel guera civil na Venezuela
Di parti di e Departamento di Estado di Merca, a pidi pa militar y forsanan di siguridad Venezolano pa “apoya democracia y proteha e ciudadanonan”.
Mientras cu e ehercito Venezolano no ta pretende di viola su lealtad, segun Vladimir Padrino, Minister di Defensa, e sociedad ta sigui dividi y ta haya su mes ante un posibel conflicto interno, analistanan internacional ta sostene.
“Cos por bira pisa”
“Tin un gran peliger cu esaki por caba den un guera civil,” e ex diplomatico Mericano, Jim Jatras, a bisa RT. “Si e militar of polis dividi, por tin un violencia hopi serio den e pais aki.”
Di acuerdo cu e experto, “Maduro no lo rindi y no lo acepta esaki. E pregunta awo ta ken lo ta banda di dje, kende lo ta na banda di Guaido y con mahos cosnan por bira,” Jatras a señala.
Di su parti, Brian Becker integrante di e coalicion antiguera ANSEWER, a recorda RT cu miyones di Venezolano a sali di pobresa durante e revolucion Bolivariano.” “Nan no lo bay acepta e imposicion di e Presidente nobo eligi pa Merca,” Becker a enfatisa, advirtiendo cu si un guera civil tuma luga, e lo ta un “baño di sanger.”
Un golpi pa expropia petroleo?
Analistanan a cualifica e reconocimento di e lider diAsamblea Nacional di parti di Trump como un metemento flagrante den asuntonan interno di un nacion soberano.
Segun Becker, ta trata di “un proyecto di e Gobierno di Merca pa restaura su influencia y promove gobiernonan mas derechista.”
E experto a sugeri cu e paisnan bisiña di Venezuela pro-Washington ta uza e situacion awo pa impulsa un golpi di Estado na Caracas.
Un colega di Becker, Gloria La Riva, a enfatisa cu Cas Blanco ta hopi interesa den hinca man den e vasto reservanan natural di Venezuela. “Si Merca awo ta reconociendo e lider falso di Guaido, tribunalnan di Merca lo purba di expropia e reservanan di petroleo di Citgo, e propiedadnan di Citgo, cu ta propiedad di Venezuela na Merca,” el a afirma na RT.
Mientras cu Maduro a responde na e accion di Washington otorgando e diplomaticonan di Merca, 72 ora pa bandona e pais, Guaido a pidi pa nan keda. Den e sentido aki, analistanan ta teme cu Washington por purba di expulsa e lider electo.
