Presidente Nicolas Maduro a anuncia di a termina relacion diplomatico entre Venezuela y Merca. Den un acto dilanti simpatisantenan e mandatario a duna e funcionarionan diplomatico Mericano 72 ora pa bandona e pais. “Mi a dicidi di kibra e relacionnan diplomatico y politico cu e gobierno imperialista di Merca”, Maduro a bisa desde e cede presidencial. Miles di opositor a marcha exigiendo pa Maduro tuma su retiro.
E decision pa kibra relacionnan diplomatico cu Merca a bin despues cu Merca a reconoce lider di opocision como Presidente interino. Juan Guaido, lider di congreso “opposition-controlled”, a declara su mes Presidente interino y a bisa di bay eleccion. E administracion di Trump a sostene esaki, cual a bisa di ta di acuerdo pa uza tur poder economico y diplomatico pa trece bek e democracia Venezolano.
Den e discurso Presidente Maduro a bisa cu Merca ta haciendo un eror grave door di purba impone un Presidente na Venezuela. A puntra Presidente Mericano Donald Trump si Merca lo uza accion militar na Venezuela pa sostone e destitucion di President Nicolas Maduro y su contesta tabata ambisioso. “Nos no ta considera nada, pero e opcionnan ta riba mesa,” Trump a bisa. E comentario a bin despues cu su administracion a anuncia cu lo reconoce lider di oposicion Juan Guaido como Presidente interino riba Maduro.
Un Parlamentario Mericano di Florida ta pidiendo pa designa Venezuela como un “estado terorista” y impone sancion adicional pa pone presion riba President Nicolas Maduro baha di su cargo. Parlamentario Rick Scott, a bisa na Washington cu Maduro “claramente ta un terorista.” Tambe e ta urgi President Mericano Donald Trump pa “mira tur sorto di sancion cu e por tin” y pa impone straf/boet na ken cu ta hacienda of sosteniendo Maduro.
Al menos dos gobierno di America Latino ta para tras di Presidente di Venezuela Nicolas Maduro. Presidente Boliviano Evo Morales a expresa su “solidaridad” cu Venezolanonan y a condena loke e ta yama “atake imperialista”. Vocero di e Presidente Mexicano Andres Manuel Lopez Obrador tambe a bisa di ta sigui reconoce Maduro como e Presidente di Venezuela.
