Cerbes Chill hunto cu Elite Empire Entertainment ta orguyoso di colabora un biaha mas pa trece bek un di e festivalnan mas gusta na Aruba y den nos region. Ta trata aki di Flip Flop Festival cu ta tumando luga diasabra dia 1 di juni 2024 na Bushiri Beach Arena. Desde aña 2018 e festival aki no a tuma luga y a keda un bashi grandi den e fanaticonan. E edicion aki lo ta e di nuebe edicion y lo consisti di dos diferente area, varios banda y dj for di exterior y tambe local. E organisacion a logra di haci varios encuesta riba preferencia musical y a logra di haya un combinacion di artista di entre otro soca, reggae y mas.
Un di e artistanan principal ta un di e exponentenan mas popular di e genero di soca y dancehall esta KES. KES The Band ta bini for di Trinidad y no ta desconoci riba nos isla. Siman pasa nan a caba di saca un album nobo ‘Man with No Door’ cu diferente hit hunto cu Shaggy, Busy Signal y otro. Durante e ultimo lunanan nan agenda tabata hopi ocupa cu diferente presentacion na Miami, Orlando, New York y mas. E exitonan di Kes ta ‘Hello’, ‘Savannah Grass’, ‘Work Out’, ‘Like it like that’ y mas. E famoso Dj Latu y Steve Andreas, directamente for di Hulanda, tambe lo ta riba stage cu un show nunca bisto. E anuncio aki ta e asina yama ‘Phase 1’. Pronto lo anuncia mas artista internacional cu lo t’ey na Flip Flop.
Un presentacion special durante e anochi aki lo ta na encargo di Ziggi Recado & The Nayamari Band. E banda di reggae aki ta hopi popular den Caribe y Europa. Nan lo presenta un variacion di exito propio y di otro artistanan legendario den e mundo di reggae.
Nos artistanan local tambe semper a sa di haya un tremendo oportunidad pa presenta, e biaha aki lo tin presentacion di Tsunami, Mystical Connection, Nutzbeatz, Dj Sky, Dr. Eli, Yeimy, MC Samil y MC Tarrick Ras. Lo tin un di dos area apart di e stage principal y esaki lo ta e ‘Caribang Stage’. Rib’e stage aki lo tin hopi sorpresa tanto local como internacional.
Facebook live link: https://fb.watch/rxxK-2LMWJ/
Cerbes Chill ta hopi contento di por regala Aruba un festival na e nivel aki. Lo bay tin hopi oportunidad pa gana ticket durante di e siguiente simannan. Por spera promocion den diferente bar pero tambe den diferente supermercado. Ta importante pa keda conecta cu Chill via di nan rednan social y asina ta parti di e celebracion grandi aki.
Ticket ta na benta na balor di 45 florin (Early Bird) y Standing VIP pa 100 florin. Esaki ta disponibel via Pay.aw / Eliteempire.events / Citgo Boulevard y Citgo Essoville. Tambe na. Tropical Bottling Carry Out LG Smith Boulevard y Tropical Bottling Company San Nicolas. Pa mesa VIP whatsapp 5693005.
Flip Flop Festival ta un presentation Chill, Coca-Cola, Bacardi, Elite Empire, Elite Productions y XFM 102.7
