Si no tabata pa e keho internacional cu nos medio di comunicacion a haci den nomber di coleganan cu ta sinti nan mes persigui politicamente na Aruba, cu lo no tabata sa cu Ministerio Publico tabatin “pensa” di trece e dos casonan penal pa supuesto hortamento di ekipo di Gobierno y hortamento di radio di Polis, dilanti Corte. Despues di e keho oficial, Procurador General a sali defende su maneho y su decision y diripiente awe, despues di algun luna, a detene ruman di un miembro di prensa y un Polis.
Awe mainta Landsrecherche hunto cu Polisnan di Recherche Samenwerkings Team (RST) a drenta un cas den Caya Juan Pablo na Dakota y a detene un homber di fam Tromp. Ta sospecha cu e lo por sa algo mas di radio di Polis perdi. Mester menciona cu e sospechoso nunca a traha den media, pues no tin nada di haber cu ningun sorto di radio. Esey mes el a bisa Polisnan tambe awe, durante su prome interogacion. Bufete di abogado mr. Chris Lejuez ta defendiendo su interesnan.
Awe mainta tambe Landsrecherche a detene e Sub Inspector di Polis, Arie Murray. E ta “Chef van Dienst” na Warda di Polis di Noord. Ta un Polis cu un trayecto largo den e cuerpo y cu a ocupa varios puesto di importancia. A dedica hopi aña di su bida den Departamento di Recherche y a conduci varios caso grandi durante su trayectoria. A detene bou sospechoso cu e por sa mas di radionan di Polis perdi y cu posiblemente ta wordo uza pa miembronan di prensa pa por sigui nan trabou diario di informa comunidad riba sucesonan tur rond di nos isla.
Ironia ta cu den e caso specifico aki, a detene 5 sospechoso y tur a indica un nomber specifico den media, pero ainda Landsrecherche no por yega na su adres. Tambe e mesun Alto Comisario di Polis y e mesun Vocero di Polis a traha Proces-Verbaal riba e caso aki indicando cua medio posiblemente tin radio di Polis, lagando e mesun persona aki for di e lista. Ta obvio cu e investigacion ta dirigi riba un persona of organisacion specifico y pesey nos NO tin duda cu aki ta trata di persecucion politico of pa purba kibra un medio specifico, esta 24ora.com.
Nos a informa Sociedad Interamericana de Prensa entretanto cu persecusion ta continua na Aruba y cu a bolbe detene dos sospechoso mas. Ministerio Publico ta hasta uza RST, un organisacion elite di Polis cu ta investiga casonan internacional, pa nan tambe core tras di radionan di Polis perdi. Prioridad di e Procurador General saliente obviamente ta pa purba “scapa su cara” den e investigacion aki y como tal ta purba sigui yega na prueba pa presenta un caso na Corte. Con por ta posibel cu siman pasa ainda a bisa cu lo hiba e caso Corte na mita di aña si ainda ta investigando atrobe? E contesta ta facil: NO tin nada y lo purba awor di tur manera pa sea yega na of na purba crea prueba pa “toch” yega Corte.
Exito na e Polisnan elite di RST den nan intento pa purba cera mas miembro di prensa, den un esfuerso pa silencia medionan di comunicacion critico contra maneho di husticia y di Gobierno. Corda cu “mundo ta mirando Boso’.
