Un biaha mas Glenda Maduro a bin dilanti, pa loke ta e trato inhumano cu tin na Guarda nos Costa. E ta keha cu tin Venezolanonan cu si a recobra nan libertad y cu tin meldplich, y cu e persona specifico cu e ta representa, ainda ta cera y ta sinti cu ta un represalia tin den su contra. Su asilo politico a wordo nenga.
El a bin pa meld na Guarda nos Costa. Nan a want’e mesora. Nan a want’e y bise cu su asilo politico a wordo nenga. A detene bek, segun Maduro. A logra di hinca aden e apelacion. A dicidi pa haci un apelacion pa e asilo politico. Tur Venezolano cu a haci nan apelacion riba asilo politico, ta gosa di nan libertad afo.
Tin di nan cu nan a hasta nota meld mas na Guarda nos Costa, wardando e resultado di e peticion cu nan a hinca aden. E unico persona cu Trudy Hassel ta obliga pa cumpra un pasashi y pa e sali awe for di Aruba y apesar cu e tin un peticion pa asilo politico aden, ta e persona aki. Ningun otro hende mas. Tur hende ta gosando di nan libertad afo, segun Maduro. Diamars Maduro a bin, pasobra a traha un otro meldplicht diabierna cu a pasa. A laga e mucha homber aki sali, pero a traha un otro meldplicht. E prome meldplicht, e mes a caduk’e y a traha un otro, caminda cu e ta bisa cu e mucha homber aki tin cu cumpra un pasashi dia 8 di April, pa dia 9 di April sali for di Aruba.
Con ta bay saca e persona aki, siendo cu e tin un peticion aden di asilo, Maduro ta cuestiona. Pakico kier sak’e, esey ta loke cu Maduro ta puntra. Pasobra Maduro a bin prensa y papia e berdad? E ta tumando represalia riba e persona aki, segun Maduro. El a presenta na Guarda nos Costa y a haci un desordo cu Maduro, oblig’e pa cumpra un pasashi pa e persona sali awe, diaranson. Maduro a bay cumpra pasashi pe. Pero el a haci un fout, pasobra e mester a papia cu e abogado cu tabta handle cu e caso prome cu el a cumpra e pasashi. Maduro a cumpra e pasashi pa e mucha homber aki pa bay Colombia, pero ta te diabierna el a haya luga.
Ora cu el a papia cu e abogado, e abogado a bisa Maduro cu e no por saca e muchahomber for di Aruba. Pa motibo cu e tin un apelacion y e apelacion, una bes cu bo sali for di Aruba, el a caduca. Tin cu keda Aruba pa warda e resultado di e apelacion.
Diaranson mainta, e abogado a hinca un obhecion, pa asina hues tuma decision riba e caso aki. Maduro ta canando un caminda di cruz. Hassel ta haci’e pasobra Maduro a bay prensa p’e sacando tur loke ta pasa na Guarda nos Costa. Maduro a splica cu e ta lucha te na ultimo. Pasobra si ta duna e resto di e Venezolanonan meldplicht pa warda nan resultado di nan apelacion, e persona aki tambe tin cu haya su derecho. Awor aki, ni maske cu mand’e, e no por bay pasobra e ta malo. El a haya problema cu infeccion di garganta y pa su salud e no ta bon pa e bay subi un avion awor aki tampoco.
E no tabata kier pa a hib’e dokter, pasobra el a laga sa cu dokter ta sali hopi placa, pasobra no a cumpra un seguro pa pone p’e ainda. Maduro ta denuncia cu pakico net e persona aki so Trudy Hassel kier saca for di Aruba pa e warda su apelacion afo. Kico ta e motibo di esaki. Maduro ta denuncia esaki pasobra e ta haya cu esaki ta algo inhumano un biaha mas, di e persona cu ta dirigi e departamento aki. Ya pa Maduro, el a tuma represalia riba e mucha homber. Maduro a enfatisa cu ta e haci e denuncia. Si tin algo contra dje, e ora Hassel mester bin p’e, pero no pa e mucha homber pasobra e ta inocente. Ta duel Maduro pa bisa cu su gobierno, esta su partido politico MEP, ta hinca den e coalicion aki. Maduro no ta mendiga pa nan ayudo, pasobra e sa cu e cos aki ta contra di ley, cu un hende ta keda indocumenta riba nos isla. Maduro no a roga nan ningun momento pa saca e persona aki y lag’e keda liber pa Maduro.
Maduro a pidi loke ta husto. El a pidi un meldplicht. E tin forma con e por yuda e persona aki. El a pidi mil y un biaha un meldplicht pa e mucha homber aki. Pakico nan no ta dune un meldplicht manera mester ta. Pakico mester cana un caminda di cruz. Pakico tuma represalia riba un persona cu no tin nada di haber di loke Maduro ta haciendo, esta di denuncia e hechonan aki. A base di e hechonan aki, Maduro a haci un yamado na e colonia Venezolano, pa e atropeyo cu ta pasando na Guarda nos Costa, pa bay manifesta diahuebs, 11 di April, contra di Andin Bikker, minister di Husticia. Esey ta loke cu Maduro kier. E kier pa e Venezolanonan reuni diahuebs, pa bay protesta pasobra nan tin derecho di protesta pa e trato cu nan ta hayando. Esun cu kier bay protesta, Maduro ta spera nan den fila. Pa esaki, Maduro a declara cu e lo comunica cu e personanan, mirando cu nan tin un chatgroup di esnan cu ta handle esnan di Venezuela, y laga sa unda nan ta bay reuni.
