Parlamentarionan cu ta apoya e gobierno y ta forma parti di e organo mas halto di Aruba, ta permitiendo pa abuso keda wordo cometi contra pueblo di Aruba y sigur ora cu nos mira con aña 2023 tabata cabando y cu ta aproba presupuesto di Aruba cu masha fanfaria, celebra cu votonan na fabor di MEP -Raiz y awo tambe cu voto di apoyo di nan aliado den maldad, parlamentario independiente sr Rycond do Nascimento .
Un Parlamentario cu awe ta den parlamento danki na uza partido AVP,cu tabata esun cu mas tabata grita contra Friends and family ta vota pa duna gobierno “carte blanche “pa aloca mas fondo den e famoso “GOEDEREN EN DIENSTEN,cu no ta nada mas cu mas placa di sodo di pueblo pa mas nombracion politico di famianan, hasta awo nieto nan di famia di e gobierno aki nan futuro ta sigura cu fondonan publico. Fondonan cu ta bin di belasting di e clase trahado,esunnan cu tur dia mester labora pa trece un pida pan ariba mesa ta wordo uza pa fin nan politico. Un presupuesto cu no tin ningun alivio pa nos pensionadonan,no tin ningun Alivio pa nos pueblo trahado y esunnan di menos recurso .Un presupuesto cu ta a base di placa ranca di e pueblo trahado su cartera,un surplus cu ta bin di sodo y trabou di nos trahadonan.
Un presupuesto cu supuestamente ta basa ariba crecemento di nos turismo,pero cu ningun trahado den turismo ta haya un cen preto di e surplus aki. Un surplus cu ta danki na medidanan ,manera un BBO na frontera,cu ta ranca placa di chikito y grandi pa gobierno por pronkia cu ne. Enbes di duna alivio na pueblo,ta sigui aloca mas placa di pagadonan di belasting pa keda cu e fiesta di nombracionnan politico.
mr. Edgard Vrolijk como president di parlamento lamentablemente no tin mucho cos di bisa,ya cu ta instruccion e ta haya for di Cocolishi pa yama reunion di Parlamento. Y su persona si por keda core auto caro y na final tur placa cu e ta gana di pueblo ,ta pa bati martiu pa e por grita mas duro cu e por e palabra “Voor” ,pa asina su hefe cu ta minister president keda contento cu su persona. Trias politica no ta funciona den practica aki a Aruba lamentablemente.
Ademas di Partido AVP cu ta lucha tur dia den parlamento pa bienestar di nos pais, tin un solo parlamentario di MEP cu ta apoya coalicion, cu ta Alvin Molina. E ta esun cu toch tabata bin dilanti mustrando cu su gobierno no ta stima Aruba,y sigur San Nicolas no,ora e tabata bin ta cuestionando cu San Nicolas no ta hayando atencion di gobierno,cu DIP ta paralisa y no ta contribui cu crecemento di economia di San Nicolas. Parlamentario Molina a duna pueblo pa un rato un speransa, pero Molina na final toch a dobla y tambe a vota pa e presupuesto cu ningun fondo aloca pa un proyecto of mehoracion di San Nicolas. Pasobra si di berdad Sr Molina tabata kier pa su partido MEP haci algo pa Aruba y San Nicolas, e lo mester a vota contra of a lo menos bin cu amienda pa aloca fondo pa San Nicolas,pero Molina na unda cu e mester a laga su bos resona, cu ta den parlamento, a keda den silencio tambe.
Molina ta ariba e lista di e partido cu solamente ora di eleccion ta core pone candidato di San Nicolas y pa e candidatonan wordo uza pa haya voto di San Nicolas. Pero no ta laat ainda ,su persona ainda por scoge pa sea pa futuro di Aruba y San Nicolas y bin para banda di AVP of keda forma parti di engañonan haci na pueblo di San Nicolas.
“Mi tin e firme conviccion cu Molina na final si lo bin para banda di AVP y Aruba .Gañamentonan pa seis aña largo, manera un fast ferry,refineria,LNG gas,Quantum oil, compania di Spaña, Y awo despues di a biaha 6 aña largo rond di mundo gastando placa di pueblo sin logra nada ,Minister Glenbert Croes ta bin awo un biaha mas cu promesa di un refineria atrobe, un upgrader. Anto 6 aña pasa Gobierno a core cu CITGO cu tabata t’ey caba y cu lo a bira un upgrader, lag’e bay sin paga Aruba 300 miyon dollar, algo hopi dudoso cu lo mester wordo investiga. Placa cu por a wordo uza pa impulsa economia di Aruba completo,” Croes a bisa.
Pero nos partido AVP for di oposicion lo keda vigila y haci e trabou di keda señala tur e promesanan falso haci na pueblo di Aruba door di e Gobierno di mas gañado y malo den historia di Status Aparte.
