“Manera mama cu mi ta, mi semper a purba di respeta e privacidad y intimidad di mi yui muhe chikito, pa asina tambe por proteha su salud mental. Pero e momento a yega pa papia e berdad di loke a pasa. Mi ex, Sciandri Lesire, a abusa sexualmente di nos yui muhe di 6 aña”, asina Josselyn Romero, kenda a entrega keho contra su ex, a skirbi riba rednan social.
“Mi a conoce Sciandri na aña 2015 y mi a biba casi 3 aña cu ne na su cas na Tanki Flip. Den e tempo aki nos yui muhe a nace. Contrario di e peleanan amoroso unda e yiu ta poni memey cu ta specula den otro medio, esaki nunca a sosode. Mi a dicidi di laga Sciandri pasobra e tabata maltrata mi verbal y fisicamente, pero cada bes cu mi tabata purba di aleha, Sciandri tabata menasa mi cu kita su bida of kita mi yui for di mi”, asina e mama di e criatura ta conta.
Mas leu e ta bisa cu “Un dia mi a bis’e stop y mi a bay cu mi yui cerca mi famia pa asina por tin trankilidad y por brinda mi yiu muhe e ambiente di amor cu e merece. Sciandri a sigui su bida y a establece un relacion cu otro pareha(nan), cu despues mi a haya sa, tambe a sufri di maltrato fisico y verbal di su parti.”
“Mientras cu mi a biba cu Sciandri, mi nunca a sospecha nada, pasobra mi semper tabata cu mi yui y e no a haya e chens di abusa di dje. Ta ora mi yui a bira mas grandi, despues di nos separacion, cu el a probecha ora mi yui tabata bay bishita su tata. Mi a cuminsa ripara actitudnan straño y mi no a laga mi yui bishita su tata mas, nan por a wak otro pero solamente bao mi supervision, en berdad mi kier a kibra tur laso pocopoco”, segun Josselyn Romero ta relata su testimonio publicamente, mientras cu e investigacion penal ta andando.
“Un aña despues, den aña 2021, e wela paterno di mi yui a insisti pa busc’e y asina e por a celebra dia di tata cu su tata. Mi a acepta pasobra mi yui tabata haya su tata su falta y mi a confia cu su wela lo ta pendiente di tur cos. Ora mi yui a yega cas, el a confesa mi loke su tata tabata haci ora nan tabata nan so, cu hopi rabia el a bisa mi cu e no kier a wak su tata nunca mas. Den mi angustia y dolor, mi a haci un denuncia y mi a contacta e ex-parehanan di Sciandri. Esaki ta e momento unda mi a haya sa cu lamentablemente nan tambe a pasa door di e mesun situacion ora cu Sciandri a abusa di nan yui menor di edad.”
E ex-pareha di Sciandri a skirbi na final cu “Dia 9 di juli 2022 Sciandri a wordo deteni y pa hopi persona den su circulo esaki por ta un sorpresa, aunke mi sa cu esaki tambe a wordo oculta door di hende cercano na Sciandri. Mi inbox a yena cu menasa y ofensa di hende cu ta kere cu mi ta capas di inventa algo asina nefasto cu ta involucra mi yui muhe chikito pa e simpel echo di susha Sciandri su nomber. E realidad ta cu ningun di e personanan aki ta imagina e dolor y e cicatriz cu esaki lo laga den mi yui su bida, ni tampoco sa cuanto mi a duda di skiribi esaki pensando semper pa cuida mi yiu su inocencia, aunke su mesun tata a corumpie caba. Con mi ta bay splica mi yiu esaki ora e tin uzo di rason, ora e haya su cu su tata ta deteni, ora e cuminsa scucha comentario? Con mi ta bay splica mi yiu cu su mesun tata a hacie e daño aki? Mi no sa kico ta bay pasa y ta yena mi di frustracion y miedo pa sikiera pensa den e posibilidad cu Sciandri por sali den libertad. Pero si algo mi por haci ta, kibra silencio tocante loke a pasa pa asina tur hende por sa ken Sciandri ta di berdad y vooral, pa proteha mi yiu muhe y tur mucha di e monsternan ‘ki cu ta disfrasa nan mes tras di un mascarada pa sconde nan enfermedad y mente siniestro”, asina Josselyn Romero a termina bisando.
Desde diasabra a detene Sciandri Lesire, pa motibo di e keho aki. Abogado mr. Demis Illes ta su abogado. Parce cu ainda nan no a ni interoga e sospechoso ainda, pues ta pendiente pa esey sosode dialuna awo. Entretanto e mama a conta su testimonio caba riba Facebook, indicando cu ta aña pasa algo lo a sosode na cas di mama di Sciandri, un señora cu ta traha hopi aña na Imeldahof. Ta di duna husticia espacio pa investiga e keho di e mama, scucha e mucha victima y tambe e band’i medaya si e sospechoso, pa na final un hues dicidi riba ken ta culpabel of no.
