Recientemente Dr. Horacio E. Oduber Hospital a anuncia su prome empleado di luna di e aña aki, den persona di Jose Luis Kock di departamento Medisch Techniek.
Coleganan di Jose Luis Kock a bini hunto pa celebra su titulo como empleado di luna. A nomina Jose Luis basa riba e balornan fundamental di Hospital ademas di e amor cu e tin pa su trabou cu a resalta durante su carera largo na Hospital.
Jose Luis ta un persona cu ta scucha bon kico e deseonan di su cliente ta. E ta servicial, ta comunica na un manera cla y ta haci su trabou cu satisfaccion.
Semper e ta cla pa yuda su clientenan interno di HOH y su coleganan di departamento. E ta consistente den su comportacion integro, ta respeta tur persona y ta traha na un manera nechi. Ademas, e ta cumpli cu tur responsabilidad y ta realisa nan di un calidad halto demostrando su profesionalismo.
Jose Luis ta un persona habri pa siña y asina a crece hopi den e organisacion aki. Tambe e ta un persona pro-activo y independiente, realisando tur su trabounan na un manera corecto y cu gusto.
E trabou di medisch electronica ta encera loke ta “service” tur aparato medico, pues trabounan preventivo y corectivo. Tambe tin e parti cu nan ta duna instruccion of sosten na e personal medico of nursenan. E trabou aki ta dinamico, pasobra tur dia tin algo nobo. Tur dia ta topa cu diferente reto y p’esey Jose Luis Kock ta pas den e departamento aki. Ademas, e ta haci e trabou cu hopi amor.
E escohencia di Jose Luis Kock como empleado di luna di januari tabata uno bon y sigur mereci, asina Mark Hassell, lider di team medisch techniek, a duna di conoce. Hassell ta corda tempo el a cuminsa traha na hospital, Jose Luis Kock a gui’e pa siña e cosnan basico. E ta un persona cu semper t’ey ora cu e departamento mester di extra ayudo. Un punto cu ta pone Jose Luis sobresali ta cu ora tin trabounan for di su oranan di trabou, semper e ta disponibel.
Su colega Franklin Giel, medisch electronicus, a duna di conoce cu Jose Luis Kock ta un colega cu hopi disciplina y esey ta un punto cu ta resalta hopi den su trabou. Tur cos cu pidi’e e ta cumpli cu nan. Tambe e ta un persona cu ta gusta sigui siña mas y p’esey por conta riba dje. Pabien Jose Luis cu e bunita reconocimento aki!
