Rosario College tin un preocupacion encuanto e trafico rond di e scol. Cabesante di Rosario College, Monique Trapenberg, a splica cu e problema cu ta birando dia pa dia ta cu e mayornan no ta tene nan mes na reglanan di trafico y nan ta kere cu nan por yega y para mey mey di caminda, riba zebrapad, pa e ora eynan nan bin busca e yiu for di scol.
Personanan dimes tin pura, pero mester corda haci cierto areglo di orarionan cu tin cu busca e muchanan. Ta 300 alumno tin na Rosario College y tur tin cu yega cas of na nan Trai’ Merdia.
Situacion
Segun Trapenberg, tin cu djis sigui reglanan di trafico normal. Para na banda, no mey mey di caminda, ni riba zebrapad. E muchanan cu ta sali y tin cu bay Trai’ Merdia of crusa caminda, no por haci esaki, pasobra e auto ta para riba e zebrapad.
Hopi biaha un ta para banda di otro. Esun tin pura, pasa otro. A yega di sosode den pasado cu autonan a hera pasa riba mucha pasobra ningun no tin respet pa otro riba e caminda dilanti scol.
Ta pone cu mainta y merdia, ora cu scol caba, tin cu para pafo pa por dirigi e mayornan. Hopi biaha e reaccion ta hopi negativo di nan parti. Loke cu nan ta contesta, no ta algo di bisa.
Ayudo
Hunto cu e directora anterior di SKOA, Trapenberg a yega di manda carta pa mayornan na October 2017, pa nan colaboracion y paga tino riba trafico y e situacion cu ta delicado pa nan mes yiunan. E por a lanta algun mayor for di soño. Algun di nan ta sigui e regla. E luna siguiente a bolbe manda un carta, cual tabata na November 2017 y e tabata rustig pa un tempo.
Trapenberg mes, hunto cu e cabesante interino ta para pafo pa yuda. Pero manera cu bay bek paden, e situacion ta cambia atrobe. E ta bira no solamente cu bo ta hayabo ta educa e muchanan, pero educa e mayornan tambe. Tin biaha nan ta tuma hende hopi na malo pa esey.
Suplica na mayornan
A hinca den buki di informacion di e scol kico ta e reglanan y pa mantene na nan. A pidi yudansa di polis, di DOW, pasobra net e zebrapad dilanti di scol, no a haya un man di verf, pero tur rond si. Ta pidi nan casi tur dia, por fabor sigui e regla. Paga tino na e muchanan cu ta sali for di cura di scol. Nan ta boso yiunan, pero ta responsabilidad di e cabesante tambe y no kier warda te ora algo lamentabel sosode pa asina tur e instancianan dicidi di haci algo. Ta pesey nan mes ta bayendo mas leu cu informacion pa e mayornan.
