For di momento cu a inicia cu lesnan di algemene muzikale vorming (formacion general di musica) na september 2019, financia pa Ministerio di Husticia di Hulanda bou auspicio di Leerorkest Amsterdam, Fundacion Leerorkest Aruba a realisa con hopi muchanan di Aruba tabata cla pa un proyecto asina.
Rose Marie Provence di Muchila Creativo tabata esun encarga cu preparacion di e lesnan di musica, cu ta ilustrativo di e colaboracion cu Leerorkest Aruba ta boga p’e. Di e forma aki kier ancra e fundeshi di musica den scol basico na Aruba pa asina brinda muchanan e oportunidad pa no solamente siña mas di musica, pero tambe pa desaroya abilidad creativo, social y comunicativo.
Den e luna di Februari docentenan di Leerorkest Aruba a uni cu nan coleganan di Leerorkest Curaçao y Leerorkest Bonaire pa un tayer intenso bou encargo di Leerorkest Amsterdam. Docentenan di Hulanda a comparti nan conocemento y experiencia, pa asina yuda e diferente islanan den nan afan pa contribui na desaroyo di tur mucha.
Tambe den e luna di Februari Aruba a ricibi 144 instrumento (fio, cello, dwarsfluit, clarinet, trompet y trombone) for di Leerorkest Amsterdam y na Maart e muchanan di klas 2 y 3 di e scolnan, Colegio Laura Wernet Paskel y Prinses Amalia Basisschool lo mester a haya les ariba nan instrumentonan. E lesnan aki lo mester a culmina den e luna di Juni cu un concierto. Lamentablemente tur cos a para pa motibo di COVID-19. Sinembargo, apesar di e ‘lockdown’ cu e muchanan na cas, LeerOrkest Aruba a percura pa nan a sigui cu nan lesnan di AMV (algemene muzikale vorming) via TeleAruba.
“Hopi scol a mustra interes pa e programa di Leerorkest. E ta nifica cu e fundacion na Aruba mester cuminsa traha riba su fondonan propio pa continua y amplia e programa pa asina mas alumno di nos isla haya e mesun oportunidad aki. E intencion ta pa cuminsa cu un curso na IPA pa forma mas docente di musica pa asina por amplia e oferta di conocemento y tambe lo cuminsa den e luna di september cu lesnan di AMV online.
Di e forma aki, LeerOrkest Aruba a mustra cu a ranca sali cu hopi animo y cu tur intencion pa sigura cu tur alumno di scol basico na Aruba pronto lo por probecha di e rikesa cu musica ta representa, cu ta sosten emocional y creativo pa promove e potencial di cada uno”, segun Johnny Croes, iniciado y Lider di Proyecto Leerorkest Aruba.
Y pa celebra conclusion di su prome aña, kizas hopi cortico, pero sigur no menos exitoso, Leerorkest Aruba lo presenta su concierto. E lo no ta e concierto bibo cu a pensa na prome instante. E lo ta un concierto virtual, Diadomingo dia 26 di Juli pa 6’or di atardi. E concierto aki lo yega na comunidad pa medio di livestream via nos pagina di Facebook, Youtube channel y TeleAruba. No perde esaki.
Pasobra Musica ta pa Tur Mucha!
