Aruba no a acepta condicion di Hulanda: A manda un contraproposicion awe

No a firma ni tampoco a manda aproba e condicionnan, esey por conclui despues di e conferencia di prensa yama pa Minister Presidente mr. Evelyn Wever-Croes awe tardi na edificio di Conseho di Minister. Ey el a splica cu ayera a drenta un contraproposicion di Gobierno di Hulanda, den cual a duna Aruba te awe pa contesta y tuma un decision. Aunke a menciona cu no tin espacio pa dialogo ni cambio, toch Conseho di Minister a manda un otro contraproposicion bek pa Hulanda, sperando di por tende pronto bek for di nan.

Manera ta conoci, Gobierno di Aruba a solicita un fiansa adicional pa e siguiente tres lunanan for di Hulanda. Ta trata aki di un suma di no menos di 204 miyon florin, cu ta bira e di tres fiansa cu Aruba ta haya di Hulanda durante e periodo aki di Covid-19. Cu e placa aki lo uza pa cubri gastonan pa juli-augustus y september proximo. Ta trata di gastonan manera Subsidio di Salario, FASE y gastonan operacional di Gobierno mes.

Gobierno ta duna update riba negociacion cu Hulanda

Gobierno ta duna update riba negociacion cu Hulanda

Posted by 24ora on Thursday, July 16, 2020

Gobierno di Hulanda a informa Gobierno di Aruba, di Corsou y di Sint Maarten cu si no acepta e 18 condicionnan cu a impone riba mesa, cu lo no los e placa pa fiansa. Entre e condicionnan tin dos cu ta pisa hopi pa nos isla, cu ta un Consensus Rijkswet pa crea un supervision financiero y pa crea CHE, un entidad nobo cu lo fia nos placa pero cu lo contra maneho financiero tambe riba nos pais. Pa por aproba e ley di consenso aki, mester pa Gobierno di Aruba y un mayoria den Parlamento pa sostene e ley. Parlamento di Aruba, incluyendo e 8 miembronan di MEP, a informa Gobierno caba cu nan NO ta sostene e leynan aki!

Prome Minister mr. Evelyn Wever-Croes a informa awe cu e documento nobo cu Gobierno di Hulanda a manda ayera pa Gobierno di Aruba, basa riba e combersacionnan y reunionnan cu a tuma luga na Den Haag riba diahuebs y diabierna ultimo, no ta refleha e peticionnan pa cambio cu Aruba a pidi.

Ministernan mr. Xiomara Maduro di Financa, Minister Presidente mr. Evelyn Wever-Croes y Minister mr. Andin Bikker di Husticia durante e conferencia di prensa awe tardi den sala bieu di Conseho di Minister.

E prome mandatario di Aruba a splica cu e tin problema cu algun di e condicionnan cu Hulanda ta impone mara na e fiansa. Ta trata aki di entre otro e cambio di edad di pensioen, cambio den accionnan den companianan estatal, dolarisacion y algun plan adicional cu Gobierno ya tabatin cla caba den preparacion pa ehecuta, por ehempel Reforma Fiscal. Di otro banda, Gobierno di Aruba ta busca clarificacion riba e autoridad cu kier duna e entidad nobo cu lo ehecuta e fiansanan na nos isla.

Como cu ta awe tardi Gobierno a manda e contraproposicion pa Hulanda, cu awor ta spera pa haya contesta. Prome Minister Wever-Croes a expresa awe tardi cu e ta convenci cu lo alcansa un acuerdo cu Gobierno di Hulanda. Un fecha no tin ainda, pero ta tene na cuenta si cu e siguiente reunion di Conseho di Minister di Reino Hulandes ta tuma luga na Den Haag dia 14 di augustus 2020, pues tin algun siman mas pa por yega na un acuerdo prome cu un decision formal cay durante dicho reunion. Di otro banda, tanten cu Conseho di Minister di Reino no aproba e di tres “tranche”, cu no ta fia Aruba e 204 miyon florin tampoco.

Riba e desaroyo ey, Minister Presidente Wever-Croes a sigura cu Gobierno di Aruba mes tin suficiente fondo na e momento aki pa por cubri e gastonan pa e luna aki di juli y otro luna, esta augustus. Despues di esey si nos ta den problema financiero serio si acaso nos no logra yega na e fiansa. “Pero nos tin tempo ainda y nos ta spera cu pa e ora ey nos a alcansa un acuerdo caba of lo explora plan B, C of D”, asina Minister Presidente Wever a enfatisa awe tardi.

Na final, e lider di Gabinete Wever-Croes a corda tur hende cu Gobierno di Aruba a bin ta cumpliendo cabalmente cu tur e condicionnan den pasado cu Gobierno di Hulanda a impone caba. Ta tene cuenta cu CAft mes a skirbi esey den su conseho na Conseho di Minister di Reino Hulandes ora a aproba pa fia nos e suma aki pa e siguiente tres lunanan, pero Conseho di Minister di Reino a dicidi otro y a bin cu condicionnan adicional. Tambe a tene cuenta cu hasta Secretario di Estado Raymond Knops mes tambe tabatin palabra di elogio pa e maneho financiero di Gabinete Wever-Croes. Pues, bisando esey, Minister Presidente Wever no ta compronde dicon e posicion asina fuerte di Gobierno di Hulanda contra Aruba.