Na cuminsamento di aña tabatin un delegacion di Hulanda na Aruba den cuadro di un museo cu lo bira realidad na aña 2028 na Amsterdam, Hulanda. Entre nan, ex-parlamentario John Leerdam kende ta un di esunnan cu ta forma parti di e comision pa haci e proyecto aki posibel. Na e ocacion ey e comision cu ta carga e nomber di “Team Slavernij Verleden Gemeente Amsterdam” a topa cu Gobernador di Aruba, Prome Minister mr. Evelyn Wever-Croes y cu representante di VNO na Aruba. A organisa hasta un evento na Archivo Nacional hunto cu varios stakeholder y tur interesa den e proyecto.
E museo lo ta uno basa riba historia di catibo. Gran parti di e historia aki ta echonan cu a tuma luga entre e islanan di Caribe Hulandes y Surnam. E delegacion ta bishitando tur e islanan p’asina recluta mas hopi informacion posibel den cuadro di e proyecto di e museo aki.
John Leerdam a comenta cu e prome sentimento cu e tabatin ta cu e ta sintie honra di por forma parti di e trabou aki. E ta consciente kico e museo aki lo nifica pa su antepasadonan pero tambe pa e situacion actual y pa e hendenan color scur cu ta den exterior.
John Leerdam ta sinti e resposabilidad directo pasobra e sa cu esaki ta mas cu djis un simpel proyecto. Esaki ta hopi importante pasobra nan ta spera cu no unicamente por analisa cu otro kico a sosode en realidad. “Nos tabata un hende prome cu sclavitud a bin. Nos antepasadonan tabata hende, nan tabatin nan propio bida, nan propio historia prome cu cos tabata asina leu. For di prome cu a colonisa nan y antes cu sclavitud a bin”, John Leerdam a comenta.
Ta e orguyo ey mester duna bek na comunidad. John ta productor (regisseur) di profesion, door di esey el a siña scucha no unicamente na loke hende ta bisa pero sino tambe na e mensahe su tras. E topico aki por crea confrontacion y ta pa e motibo ey mes tin biaha hende no kier bisa cierto cosnan.
Gemeente Amsterdam t’esun cu a cuminsa cu e iniciativa aki. Leerdam a splica cu nan lo bishita Aruba mucho mas biaha den cuadro pa realisa e historia aki. Na Hulanda mes casi no tabata di esclavo, compara cu e islanan; Aruba, Corsou, Boneiro, Surnam, etc.
E historia di slavitud trans-atlantico ta forma e punto di salida pa e museo, cu espacio pa inclui tambe e historia di sclavitud Indisch-Oceanisch. E museo lo ta destina pa un publico grandi, cu enfoke riba educacion, arte, conocemento y investigacion.