Recientemente conseho di minister a aproba pa elimina e 5.5% di recorte di entrada di trahadonan den sector di cuido. E decision aki pa algun ta positivo pa otro negativo. Pa e trahadonan, claro, e ta na su luga pa cobra bo placa manera mester ta y sin cu ningun hende ta kita ningun cen for di bo. Pero, pa Hulanda, e decision aki no ta esun di mas miho y tampoco ta mucho contento cu e decision aki. A puntra Minsiter Dangui Oduber riba opinion pa cu asunto aki.
Segun Oduber, a evalua hopi bon prome cu a yega na e decision aki. A mira diferente scenario pa wak for di unda ta ricibi e fondo pa cubri e placa aki y na final por conclui cu elimina e recorte ta responsabel. Tin suficiente fondo den AZV pa cubrie y hasta ta papia di un surplus pa cu e fondo di BAZV. Minister Oduber ta sinti cu ta na su luga pa duna e trahadonan nan placa bek, cu nan merece.
E trahadonan den sector di cuido tabata solidario durante pandemia cu e pueblo y awo ta nan derecho pa cobra nan cen completo bek. E decision no tabata di un dia pa otro. For di januario a sinta cu CAFT y a informa nan riba e intencion di gobierno pa cu e recorte. A splica nan e diferente motibo cu tin, p’asina duna e dunadonan di cuido e 5.5% di recorte bek.
E funcionarionan publico a ricibi nan placa completo bek for di januari caba y ta apenas ta aproba pa e dunadonan di cuido tambe por ricibie completo. Ora mira e fondo di AZV, e ta uno sostenibel mirando cu nos entradanan ta cubri nos gastonan. Lo sigui monitor e fondo di AZV di cerca p’asina sigura cu e ta keda uno manehabel y responsabel. Na final Oduber a subruaya cu Aruba por ta urguyoso di AZV mirando cu ningun caminda na mundo tin un prima di seguro medico manera esun di Aruba.
