John Leerdam, Kwartiermaker Nationaal Slavernijmuseum, tambe tabata presente na e evento anual di Genootschap Nederland-Aruba, cu su celebracion tabatin e punto di enfoke di e pasado di sclavitudad di e islanan di Caribe Hulandes.
Tabatin diferente orador cu a hiba palabra e diasabra mainta aki pero esun cu a hala atencion di Leerdam tabata e discurso di Minister di Cultura di Aruba Xiomara Maduro, kende a cuminsa su discurso cu palabranan fuerte pero real. “El a haci’e di un forma nechi, pero a bisa tambe locual cu hopi hende di Aruba y e otro islanan ta pensa.” Aki e ta referi na e echo cu a pidi disculpa y ainda ta preta e islanan den un forma di impone en bes di traha hunto banda di otro, principalmente riba tema financiero.
Na opinion di e ex-politico di PvdA, ta momento pa un y tur refleha bon riba loke e minister a bisa. A pesar di tur disculpa pidi pa cierto cosnan cu a pasa, tin cierto cosnan cu no a soluciona, ainda. “esey mi ta haya lamentabel, pasobra hustamente esaki ta e momento cu nos hunto den Reino Hulandes por sigui crece y soluciona cierto punto sensibel riba e pasado di sclavitud pero tambe riba colonialismo.”
Leerdam ta sinti cu e aspecto ariba menciona ta masha importante pasobra no mester lubida cu e generacion nobo mester tin un vision pa futuro. Esaki ta su rol tambe den e funcion nobo cu e tin, pa crea un union den Reino Hulandes riba e tema aki.
Ken ta John Leerdam
John Arnold Walther Julius (John) Leerdam (Willemstad, 23 juli 1961) ta un director di teatro y ex-politico. For di 2003 pa 2010 y tambe na 2012 e tabata miembro di Tweede Kamer pa Partij van de Arbeid (PvdA).
