Famia Planea un biaha activo cu lansamento di nan campaña pa temporada di Carnaval. Despues cu dos aña cu no a celebra Carnaval, no nifica cu Famia Planea no tabata activo den planificacion y preparacion. A update nan mes riba pregunta y duda cu e hobennan riba nos isla tin riba e tema di sexualidad entre e comunidad hoben.
Ghislaine Koeiman, trahado social na Famia Planea Aruba a duna informacion kico tur por spera e aña aki. Campaña e aña aki lo ta
enfoca riba e lema: “Ami ta dicidi 2023”. A bin hopi pregunta dilanti di tanto pashent como nan partnernan como cu e temporada ta basta
cortico. Pa e motibo aki mes a tuma decision di extende e temporada di campaña te cu Semana Santa/ Campamento y asina cubri ambos ocasion activamente.
Pa locual ta trata na presencia y actividad durante e prome temporada, cu ta esun di Carnaval, lo organisa diferente workshop na diferente
scol secundario. Un apelacion ta bay na e scolnan cu ainda no a haci solicitud ni yena fecha pa workshop, pa haci esaki mas pronto posibel.
Si acaso no alcansa durante temporada di Carnaval, ainda tin posibilidad pa haci esaki pa e temporada di Semana Santa. Por haci
esaki via e-mail: [email protected] of por tuma contacto directamente via telefon na: 588-9591.
Tambe por acerca oficina di Famia Planea pa asina haya no solamente bon informacion pero tambe cumpra bo producto, bo condom, na un prijs special. Un variacion total di producto ta obtenibel akinan. Tin di menciona cu por lo menos 24 diferente tipo di condom ta disponibel na Famia Planea pa e cliente su escogencia y gusto.
E mensahe y lema di Famia Planea ta; “Ami ta dicidi”. Organisacion, mayor, educador, tur por papia cu e hoben riba e tema di sex pero e
decision final ta den man di caba hoben. P’esey ta educa y conscientisa via campaña manera esaki pa cada hoben, si tin cu yega
asina leu, pa tuma un decision consciente sin cu ningun hende forsa bo na algo no tabata kier.
Ademas di anuncia e comienso di nan campaña, a lansa oficialmente nan jingle nobo pa e temporada di conscientisacion di Famia Planea.
Diferente artista/talento a yega hunto pa asina awe por tin un otro bunita produccion pa stimula e comunidad cu ne.
Justin Valdez (cantante), Ryan Isabella (areglista y produccion), Reanne Ras (cantante) Y Randell Luidens ta e team encarga pa e
produccion y video clip di Famia Planea pa 2023. Valdez a indica cu, cada un cu nan aporte pa asina yuda via nan talento pa trece un produccion di calidad.” E ta un experiencia unico y ta sinti bon di por trece un mensahe positivo na nos hubentud”. Isabella di su banda a indica, cu esaki no ta su prome biaha cu ta forma parti di un produccion pa Famia Planea, e ta masha orguyoso semper di por ta parti di esaki. “Un jingle yena di energia, sigur e mensahe ta un tiki mas cerca di e hobennan den e forma aki di trece dilanti”.
No ta prome biaha cu e ta traha cu Randell Luidens y ta gradici Famia Planea pa un biaha mas deposita nan confiansa den nan trabou y talento pa trece un produccion mas dilanti pa nan.
Reanne tambe a forma parti tanto den e video clip como cantante di e jingle: ”E ta un mensahe cu ta special pa cada hoben y tabata un
placer di por a forma parti pa trece esaki dilanti”. Randell Luidens como cantante, areglista y productor di e video clip pa e campaña di e aña aki. El a menciona cu tur cos a cana lihe y na gusto como cu no ta prome aña cu ta traha cu Famia Planea. Nan semper ta den bon comprondemento kico ta desea, spera y ta buscando pa yega na un produccion final cu semper ta na agrado di e cliente.
Randell a bisa aunke e tempo tabata corto, e producto final ta parce di a hiba hopi tempo den produci pero e la cana den bon tempo. Asina
mes a hinca tur nan esfuerso y cu granito di tur cu a aporta a logra un tremendo producto final. “ Mi tin hopi aña trahando cu Famia Planea
y ta sinti cu nos a bira un famia di Famia Planea”
