Memey di su simpatisantenan y miembro di partido Union Patriotico Boneriano, James Kroon a presenta na Tia Sani, na Rincon, p’asina deposita su voto p’e eleccion di Eilandsraad.
E multitud sigur a demostra di ta sostene Kroon fervientemente.
James Kroon, lider di partido, a comenta cu e campaña a bay bon. A trece nan plan pa bay p’e cuater añanan y pueblo a acepta esaki.
Despues cua presenta cu tur otro partido a bay traha nan programa y imita nan, ta keda awo na pueblo di Boneiro pa nan bay vota.
“Ta nos t’e unico partido cu tin e ekipo pa carga loke nos a bin ta splica,” ta loke Kroon a indica. Tur otro partido, despues cu a bin cu nan ideanan, a tuma esakinan over. UPB ta sumamente contento cu por fin e otro partidonan a realisa cu e unico partido cu por salba y hiba e pueblo dilanti ta Union Patriotico Boneriano.
Por a mira e multitud grandi sali fo’i cas y vota diaranson. UPB ta cla pa celebra e victoria hunto cu e pueblo Boneriano.
CINCO ASIENTO
UPB ta boga pa cinco asiento. Si resulta UPB keda net uno asiento menos.
Kroon a indica fo’i diamars, “Nos ta traha cu tur partido.” Depende resultado di e eleccion por mira e ora cua partido lo tin e vision y pensamento cu ta cuadra cu UPB, eynan lo por yega na un gobierno.
BONEIRO NO TABATA FUERTE SUFICIENTE
Den e ultimo cuater añanan por a mira cu Boneiro no tabata fuerte suficiente. P’esey UPB a pone un liña cla y firme. Ta p’esey a pidi sosten masalmente n’e pueblo Boneriano p’asina UPB so carga e parti, caminda cu nan so por ta den gobierno p’asina tur locual cu kier logra p’e pueblo di Boneiro por haci esaki.
TRES PUNTO
UPB a pone tres punto, cuminda, vivienda y desaroyo y pensioen general p’asina tur Boneriano tin sigur nan tin algo den nan saco ora nan bira grandi.
Ta imposibel cu ora hende yega e edad di 65 aña ainda tin cu cremencha p’e por biba un bida decente.
UPB a pone esaki como e puntonan. P’esey nan tin un team p’asina hunto cu e pueblo di Boneiro goberna na un manera fuerte y den balans.
RELACION CU HULANDA
Ramoncito Booi a expresa cu un di su deseonan ta trato igual firma cu Hulanda.
Eventualmente cu UPB gana, Kroon a indica cu nan a mira e ultimo ocho añanan loke nan como UPB a vocifera no tabata carga. P’esey partido Demokrat a haya e chens na 2015, na 2019 MPB a gana eleccion masalmente, caminda cu nan a haya cuater asiento y UPB a sostene nan. P’esey a bisa pa “duna nos e mandato aworaki p’asina nos bay atende y negosha cu Hulanda, no cu pleito.”
Aparentemente Clark Abraham ta pensa den pleito y MPB ta mucho suave cu Hulanda.
Segun Kroon, mester ta fuerte pa negosha cu Hulanda pa trece e cambionan cu a palabra p’e pueblo di Boneiro. P’esey UPB a indica cu no ta atende cu ambtenaar Hulandes, sino cu mandatario di Hulanda, p’asina logra e derechonan total p’e pueblo di Boneiro.
