Campeonato HEINEKEN di Aruba Softball Bond dedica na dos baluarte Sra. Bertha Wolf Croes y Eugenio “Tan” Helder a continua diasabra atardi riba veldnan na Pos Chiquito. E dos rivalnan Jaguars y Aruba Bank Lady Tigers a enfrenta otro pa di 4 biaha den 3 dia diadomingo mainta. Te den di 3 inning e wega tabata sera cu Aruba Bank ganando cu e score minimo di 1-0. Sinenbargo Jaguars ta inicia un rally riba e pitcher habridor Rudlyn Ras kende ta wordo releva pa Mandy Angela anotando no menos cu 13 careda riba un serie di batasonan den tur skina den parke na Pos Chiquito. Milvienne y Rachelle Henriquez ta avansa cu dragbunt. Zuleika Peña ta conecta doblete den muraya mientras Melissah Daniel tambe ta conecta doblete den leftfield, Ludmila Geerman, Raquel Wester ta sigui cu hit pa left remolkando un total di 13 careda. Boxscore final Jaguars Vitamin Water 13 careda, 14 hit, 0 error. Aruba Bank lady Tigers 3 careda, 6 hit, 1 error. Kathleen Emerenciana ta resulta pitcher ganador. Mihor bateadornan pa Jaguars ta Zuleike Peña 3-3, Milvienne Henriquez, Ludmila Geerman y Melissah Daniel tur di 3-2. Pa Aruba Bank a destaca na plato Genilee Thiel di 1-1. Di e manera aki Jaguars a empata e serie final 2-2 forsando mesun diadomingo tras di merdia e wega desisivo. Un cos ta sigur ningun di dos equipo no kier a entrega y a brinda publico bunita serie jena cu emocion preparando pa e ultimo wega pa determina Campeon AA Femenino 2017.
