Pa Departamento di Salud Publico por sa exactamente cuanto porcentahe di comunidad a bin den contacto cu COVID-19 ta necesario pa haci investigacion bou di comunidad.
E tipo di investigacion aki ta yama Cero Prevalencia y ta consisti di saca muestra di sanger for di diferente persona den comunidad pa chek si nan tin anticurpa contra e virus SARS-CoV-2, cu ta esun cu ta causa COVID-19 . Cu diferente persona den comunidad ta referi na personanan di diferente edad, sexo y districto na Aruba.
Recientemente Departamento di Salud Publico a saca un total di 2854 invitacion pa cu e investigacion aki. E invitacion a bay na diferente cas rond Aruba pidiendo colaboracion pa cu esaki. Esunnan cu a haya e invitacion pa participa, DVG kier gradici pa e cooperacion cu ta pa un bon causa y invita esnan concerni pa tuma bon nota di e invitacion y sigui tur instruccion.
Si bo persona a ricibi e invitacion pa participa na e investigacion, bo lo mester subi e website https://form.labhoh.app/ unabes cu bo ta riba e site, si bo tin e Aruba Health App bo tin pa LOGIN. Si ainda bo no tin e Aruba Health App bo lo mester REGISTRA. Ora bo login of caba di registra bo lo mester hinca un codigo cu bo a ricibi den bo carta di invitacion. Sin e codigo aki bo no por forma parti di e investigacion.
Esnan cu a wordo invita pa participa y tin pregunta por tuma contacto cu seccion di Malesanan Infeccioso di Departamento di Salud Publico na 280.0101 of mail na [email protected]
