Cu Tropical Bottling y Aruba Tourism Authority como un di e patrocinadonan principal, lo bay tuma luga e fin di siman aki e International Functional Fitness Masters World Championship Aruba 2022.
Cuminsando for di dia 18 pa dia 20 di november, e miho atletanan di Crossfit lo ta competiendo pa converti den e atleta mas fit pa aña 2022.
Segun Will Erasmus, representando Functional Fitness Federation Aruba, a comenta cu e evento aki lo ta hunto cu IF3, esta federacion internacional functional fitness cu a duna e oportunidad pa organisa e Masters na Aruba.
Segun Erasmus, hopi hende conoce e deporte aki bao di Crossfit, pero e nomber di e deporte mes ta functional fitness, cu basicamente ta encera hisamento di peso, weightlifting, coremento, gimnasia, un tiki di tur cos. E idea su tras ta pa haya ken t’e persona mas fit na mundo.
E evento riba su mes lo tuma luga na diferente caminda rond di Aruba y basicamente ta spera hente pueblo di Aruba pa duna sosten n’e actividad aki. Tin un total di 275 atleta internacional ta biniendo Aruba specificamente p’e actividad aki pa competi y tin por lo menos 10 atleta di Aruba cu a clasifica pa por participa n’e evento aki.
