Kuminsando otro siman, e entrevistado nan di SONORO lo ta bishitando diferente kasnan pa invitá nan pa partisipá den e komunidat di SONORO; un panel pa estudionan riba termino largu. Via e panel aki e habitante nan di Kòrsou lo por duna nan opinion tokante di e bida riba Kòrsou.
En total 2300 kas a keda selektá kasualmente. E kasnan aki kolektivamente lo representá e opinion di e habitante nan di Kòrsou. Kada aña nos lo pidi e komunidat pa reflekshoná riba tópikonan manera salú i bienestar riba 4 diferente okashon. Esaki lo tuma luga pa medio di un enkuesta ònlain ku lo dura mas o menos 15 minüt. Ademas, partisipante nan di e komunidat lo por indiká tambe kua tópikonan nan ta konsiderá mas importante. “Partisipashon lo ta interesante i edukashonal. Partisipantenan lo risibí informashon tambe regularmente tokante di e resultadonan” segun Tim Martina, e Mèneger di komunidat di SONORO. “Dor di partisipá, bo lo kontribuí na e estudio ku ta purbando di kontesta varios pregunta nan importante. Por ehèmpel, kon nos ta trata ku nos salú i sen, i kiko lo por yuda nos hasi miho desishonnan ora ta yega na nos salú i sen. Tambe lo trata tópiko aktual den e estudio.”
Un miho kalidat di bida
E meta di estudio ta pa bini ku ideanan adekuá i di nivel pa Kòrsou, tur esaki den kolaborashon ku e populashon di Kòrsou. “Ademas e meta di e proyekto SONORO ta pa kontribuí na e konosementu di SIDS (Small Island Developing States) i pa mehorá e kalidat di bida di e habitantenan di Kòrsou” Martina ta konta. “E impakto sosial ta un punto sumamente importante: ku e estudio aki nos ta buskando diferente solushon nan ku ta traha pa e habitante nan di Kòrsou i ku ta pas ku nos struktura sosial i balornan kultural.”
Privasidad
E lei di sekeresia ta obligá SONORO pa trata tur informashon kolektá estriktamente konfidensial. Ademas, Sonoro ta traha huntu ku e instituto renombra CentERData na Tilburg, aki nan tur informashon lo keda warda i protehá bou di protokòlnan estrikto.
E entrevistadónan
Tur e entrevistadónan di e proyekto SONORO lo tin un badge cu nan datonan personal/potret/logo di SONORO. Tambe e entrevistadónan mester identifiká nan mes na kada kas ku nan bishitá. Ademas bo lo por bel SONORO na 5603030, pa kontrolá e nomber di e entrevistadó. Durante e entrevista, tur kas ku a keda selektá pa bira miembro di e komunidat lo risibi un foyeto ku informashon tokante di e proyekto. SONORO kier a gradisi di antemano tur esnan ku a keda selektá pa nan koperashon.
E base sientífiko
SONORO ta un inisiativa di un tim di investigadónan Kurasoleño, kual ta konsistí di Jasmira Wiersma MSc., Dr. Merel Griffith – Lendering i Dr. Renske Pin i ta risibi apoyo finansiero for di e organisashon Hulandes pa estudionan sientífiko (NWO). E guia sientífiko lo ta na enkargo di Prof. Dr. Rob Alessie di Univèrsidat di Groningen. E partner den karibe ta Curaçao Biomedical and Health Research Institute (CBHRI) representa dor di Dr. Tineke Alberts. E proyekto ta wòrdu sostené dor di un grupo di 10 experto lokal i internashonal. E miembronan di e grupo aki manera Dr. Rose Mary Allen, Ieteke Witteveen, MA , Dr. Angela Roe i Dr. Glenn Thodé, ta experto den diferente área manera salú, finansia, metodologia i aspektonan sosial i kultural.
(i) www.sonoro.community
(f) www.fb.com/sonoro.community
