Gerencia di SETAR ta contento cu e reaccion cu a ricibi te awor riba e producto nobo cu a keda lansa algun siman atras cu ta e pay.aw
ir. Roland Croes, director di SETAR, a splica cu e ultimo cifranan ta mustra cu nan tin mas cu 150 vendors cu a aplica pa uza e sistema di pay.aw cu ta algo completamente nobo na Aruba. Na Aruba tin rond di 7.000 negoshi.
Croes a splica cu pa un producto asina por crece, e mercado mester tin miles y miles di vendor. Na Aruba, manera bisa caba, tin apenas 7 mil negoshi.
Banda di esaki, SETAR ta asercando institucionnan financiero local, tratando di uni henter e grupo aki den uzo di e plataforma di pay-aw. “Si tur hende participa, e producto lo por crece. No mester lubida cu esaki ta un di e tipo di servicionan cu no ta crece y bira grandi mesora.” El a duna e ehempel di LTE cu na inicio di su introduccion, na 2013%, tabata dificil pero aworaki SETAR tin 80% di e mercado.
E prome añanan e tabata algun mil pero awo e ta miles di cliente uzando esaki. Esey ta mesun caso cu Netflix, cu a cuminsa na 1997. “A tuma nan 15 aña pa e bira grandi, mescos cu Amazon. E ta tuma tempo y nos sa cu e servicio di pay.aw ta crece ora cu tin miles di vendors. P’esey nos ta mira 2020 como un aña importante, ora cu lo bini cu mas producto nobo.”
Sistema pago
Pay.aw ta un aplicacion innovativo pa Aruba. Den e era digital, celular ta birando e aparato number un pa tur cos, di chat cu amigonan pa wak television te pa haci pago. E bentaha ta cu tin tur cos den un solo luga. Den e-commerce y m-commerce na Aruba e posibilidadnan pa haci pago digital na florin ta limita, pero awor esaki ta bay bira hopi mas facil. Rond mundo tin diferente metodonan di pago digital via bo celular uzando e-wallets.
SETAR y Aruba Bank como support partner y companianan innovativo kier a contribui y yuda trece un sistema di pago digital via celular. Pay.aw ta un plataforma all-inclusive caminda e usuario por medio di e aplicacion por haci pago via un wallet digital, tur esaki den “real-time”. Ademas, Pay.aw tin un aplicacion special pa e vendor caminda ta brinda negoshinan un instrumento pa mehora nan servicio pa nan clientela y e oportunidad pa haya mas cliente nobo como tambe haci nan operacionnan mas eficiente.
Meta di Pay.aw ta pa brinda e comunidad di Aruba un manera mas facil pa haci pago instantaneo, compra y benta di producto sin nodo di tin placa cash y cu e facilidad pa scoge entre pick-up of delivery te na porta di bo cas. Den e mundo aki, “convenience is King”! Manera menciona anteriormente, Aruba Bank ta e support partner pa e lansamento di e aplicacion di Pay.aw. Clientenan di SETAR cu tin un cuenta di banco na Aruba Bank por link esaki na e aplicacion y pasa placa di nan cuenta di banco pa nan wallet digital y di eynan haci uzo di e servicio. Pa mas informacion di Pay.aw bishita e website www.pay.aw of e pagina di Facebook di Pay.aw.
