Diabierna Parlamentario Daphne Lejuez hunto cu coleganan di su fraccion (MEP) y di Parlamento di Aruba a reuni cu representantenan di ECLAC cu ta e Comision Economico di Nacionnan Uni pa Latinoamerica y Caribe. E motibo di e encuentro ta un presentacion cu a haci hunto cu e comision local di Metanan di Desaroyo Sostenibel (SDG’s) riba e papel importante cu Parlamento ta hunga den nan implementacion.
Manera ta conoci, Aruba a wordo scogi dor di Nacionnan Uni, como un di e islanan den nos region cu por sirbi como ehempel pa implementacion di e Sustainable Development Goals pa otro nacionnan den Caribe y SIDS (Small Island Developing States) rond mundo. “E rol di Parlamento ta importante den esaki pa facilita e leynan necesario pa e implementacion di e infrastructura cu ta sostene e “roadmap” y tambe aloca e fondonan necesario,” asina Parlamentario a declara na final di e reunion cu a tuma luga den sala di Parlamento.
Actualmente e comision nacional di SDG’s ta traha riba un evaluacion y un ‘nulmeting’ cu lo yuda determina e ‘roadmap’ di Aruba. Den esaki ta haci uso di 169 indicador cu ta aporta grandemente pa autoridadnan publico tuma e decisionnan necesario, y monitor e evolucion obhetivamente pa alcansa e meta di desaroyo sostenibel. Por ehempel, den e caso di pobresa. Nacionnan Uni hunto cu e comision local ta busca pa defini kico e ta, con por midi’e y cua ta e miho maneho y plan di monitoreo pa combati pobresa.
Lejuez ta kere cu, na su luga, e SDG por bira un herment hopi importante cu cual Parlamento por midi e progreso y efectividad di maneho di Gobierno; como tambe evalua e fondonan cu ta aloca na cada departamento y proyecto ora di tratamento di Presupuesto Nacional. “Implementacion di SDG’s lo hiba na transparencia y na bon gobernacion, mirando cu decisionnan lo ta basa riba informacion, evidencia y asina por midi e efectividad di maneho y tambe lo duna sosten na decisionnan cu a tuma of mester tuma ainda,” e Parlamentario a expresa.
Durante e presentacion, cu a conta cu presencia di Departamento di Asuntonan Economico, un punto cu tabata resaltante, ta e necesidad pa colecta y comparti informacion entre departamentonan di Gobierno. Esaki ta un punto cu keto bay ta un reto pa nos pais, pero cu ta importante pa keda realisa ya cu e ta esencial den evalua si un maneho determina ta dunando e resultado desea.
Lejuez ta combenci cu uso di innovacion lo hiba na un maneho y compartimento optimal di informacion; semper teniendo cuenta cu e leynan existente cu ta proteha privacidad. Parlamentario Lejuez: “Hopi departamento di gobierno actualmente no ta comparti informacion y hopi biaha ta mantene base di data separa creando un proceso ineficiente; mientras cu por tin un sistema cu automaticamente ta actualisa cerca tur sericio publico.”
