Iglesianan Cristian di Aruba (ICA) ta un plataforma di mas di trinta Iglesia di diferente denominacion Cristian cu ta reconoce e Bijbel como e fuente maximo pa doctrina y conducta.
Pa medio di e comunicado aki ICA kier a duna e posicion Biblico tocante carnaval. Palabra di Dios ta reconoce cu tin obranan di scruridad ta tuma luga den sociedad y cu un hende cu kier biba pa Dios no mester participa na e obranan aki. Un Cristian ta wordo yama pa cana den e lus mescos cu Cristo ta den e lus.
Romanonan 13:14 ta bisa: Laga nos komportá nos mes decentemente manera den dia, no den parandiamento y den buracheria, no den inmoralidat sexual y den sensualidad, no den pleito y envidia. Si nos wak e obranan di scuridad cu ta compaña carnaval nos ta mira cu esakinan ta cuadra exactamente cu loke e texto den Romanonan ta bisa pa no haci.
Carnaval ta basa riba adoracion di varios dios di mitologia griego, entro otro Calypso y Bacchus. Pesey den carnaval bo ta tende e palabranan calypso y bacchanal ta wordo menciona cu frecuencia. Y scritura ta bisa cu tras di diosnan falso tin demoño cu ta atrae hende pa kita nan bista for di e Dios berdadero. Bijbel ta manda e creyente pa huy for di idolatria y no mantene comunion cu demoño (1 Cor. 10:14, 20).
Dicon hende rond di mundo cu un tempo tabata participa na carnaval, despues cu nan bira Cristian ta stop di participa na carnaval? Dicon Cristiannan na Aruba tin e reputacion di no ta participa mas na Carnaval? E motibo ta cu Cristiannan ta obedece loke e Palabra di Dios ta bisa. Dios su Palabra ta instrui su yiunan hopi cla pa no stima mundo ni e cosnan di mundo. Amistad cu e mundo ta enemistad cu Dios. Dios ta un Dios santo y Dios no ta wordo agrada den ningun forma cu actividadnan di Carnaval.
Hende tin un naturalesa cu a wordo afecta door di pica. E naturalesa aki ta wordo yama carni den Bijbel. E naturalesa di pica aki ta pone cu hende ta haci pica y pica ta separa hende for di Dios. Dios a bisa cu ta solamente e sanger di Cristo drama na e crus di Calvario ta e solucion pa pica di hende. Cualkier persona cu ta convenci di esaki den su curason y bisa Dios cu e ta acepta morto y resureccion di Jesus pa pordon di su pica ta haya bida eterno. E berdad aki ta para den Romanonan 10:9 -10. Cada persona cu pone su fe Cristo ta wordo saca for di e reino di scuridad y traslada pa e reino di e Yiu glorioso (Col. 1:12-13). Pesey un Cristian no ta participa na carnaval.
