Idolatria ta tur locual nos ta halsa mas cu Dios den nos bida, sea ta un persona, obheto, of posicion cual nos ta adora y nos no tin tempo pa Dios pero solamente ta dedica na esey,
Idolatria ta un trampa di e enemigo pa aparta hende for di Dios, y pone nan bira orguyoso, materialista y kere den nan propio forsa.
Mateo capitulo 6 vers 21-23 ta bisa: Pasobra caminda boso tesoro ta , eynan boso curazon lo ta tambe.
Lampi di e curpa ta e wowo , asina ta cu si bo wowo ta bon, henter bo curpa ta yen di lus. Ma si bo wowo ta malo, henter bo curpa ta yen di scuridad. Asina ta si e lus cu ta den bo ta scuridad , ki grandi e scuridad ey ta. Antes idolatria tabata wordo basa riba imagen (Daniel capitulo 3) pero awor idolatria a bira mas sofistica pa asina atrae mas hende.
Pasobra tur loke cu tin den mundo, e deseo di carni,y e deseo di wowo, y e orguyo di bida, no ta bin di e Tata , sino di e mundo.(1 Juan 2:16). Tin hopi cos cu hende ta pone prome cu Dios, sin nan mes sa, pero ora nan cuminsa ripara, cuanto tempo e aparato, posicion, of organisacion ta tuma di nan, nan ta bin realisa cu nan ta den un idolatria.
Na prome lugar bo famia ta di Dios, bo cas ta di Dios, y bo yuinan ta di Dios y sabi esaki cu nada por separa boso for di e amor di Cristo. Stima Dios y obedece Dios den tur cos.. Jeremias capitulo 2 vers 13 ta bisa: Pasobra mi pueblo a comete dos hecho di maldad,, nan a bandona Mi, e fuente di awa bibo , pa traha rembak pa nan mes, rembak cu no por tene awa.
Den Juan capitulo 15 Hesus ta bisa ami ta e mata di wijndruif , boso ta e ramanan, esun cu keda den Mi y Ami den dje esey ta duna hopi fruta, pasobra separa di Mi boso no por haci nada.
Saca tur cos cu ta separa bo for di Dios, for di bo bida, bo hogar y bo famia, no perimiti ningun hende tuma lugar di Dios den bo bida, ni maske kico cu nan priminti bo, keda mantene bo fe den Cristo Hesus. Mantene bo oracion Cristo centrico.
Salmo 115 vers 8 ta bisa: Esnan cu ta traha nan lo bira mescos cu nan ,y tur esnan cu ta confia den nan. Pesey considera e miembronan di boso curpa como morto pa inmoralidad, impuresa,pasion, deseo malo,y golosidad cual ta igual cu idolatria, pasobra pa motibo di e cosnan aki e furia di Dios lo bini riba yuinan di desobedencia.(Colosensenan 3: 5+6)
Nos curpa ta pertenece paden y pafo na Dios, nos no ta doño di nos mes,pesey no por ta asina cu hende ta adora nan curpa mas cu nan ta obedece Dios, pasobra ora bo curpa tin dolor ta Dios mes bo mester pa kita bo dolor.
1 Juan capitulo 5 vers 21 ta bisa; Yiu chikito nan warda boso di idolatria. Dios ta rechasa hende idolatra, tras di idolatria satanas ta sconde, y final di idolatria ta destruccion.(Galationan 5:19-21) 1 Corintionan 10:14 ta bisa: Pesey mi stimanan huy for di idolatria.
Ta tempo pa tur mayor aparta nan mes y nan yuinan for di tur tipo di idolatria, arepenti y busca Dios. Idolatria ta destrui bo hogar. Pastor Marcel Balootje.
