Coleganan di Hyatt Regency recientemente a participa na un referendum cu a tuma lugar den dos diferente departamento di e prestigioso hotel, caminda cu e coleaganan a expresa nan deseo pa forma parti di FTA pa medio di un CAO, pa conhuntamente trece mehorashon.
“Semper nos a respeta e derechonan di nos trahadonan na unda nan por scohe pa wordo representa pa un organisacion laboral y nos ta apoya e decision di nos coleganan” Sr. Cabrera, Area Vice President y futuro General Manager di Hyatt Regency ta declara. “E bon reputacion como un hotel ‘premier’ y cu standardnan halto na Aruba ta exisiti pa hopi aña caba y ta danki na nos coleganan cu ta lucha pa excelencia – no solamente pa nos huespednan- sino tambe pa otro coleganan tur dia. Nos cultura ta construi riba e fundeshi di respet mutuo y e union familiar entre nos.”
Ta asina cu durante un conferencia di prensa Sr. Hubert Dirkzs di FTA a acusa maneho di Hyatt Regency di intimida y incluso menasa trahadonan cu ta considera di uni na e sindicato, algo cu e gerencia di Hyatt ta refuta y lamenta.
Pa mas di 28 aña Hyatt Regency a sa di destaca y contribui na Aruba su turismo como un di hotelnan mas renombra den servicio y calidad. Esaki ta danki na e coleganan cu dia tras dia ta labora cu dedicacion y lealtad como un gran famia di Hyatt Regency cu ta consisiti di mas di 600 empleado.
Gerencia di Hyatt Regency kier a tuma e oportunidad pa garantisa nan respet y sosten incondicional na cada trahado, independiente di nan decision tuma durante e referendumnan laboral andando”, Sr. Cabrera ta declara. Gerencia di Hyatt ta subraya cu semper ta y lo keda habri pa dialogo y negociacion cu sindicatonan cu e fin di mantene e bon balanse den e bienestar di tur empleado, cu ta forma e gran famia di Hyatt Regency.
