Shete aña di un proceso doloroso awe a yega su fin, por lo menos pa Melony Croes-Paesch. Awe el a haya e grato noticia cu Ministerio Publico lo no persiguie mas den Corte di Casacion na Hulanda.
Esaki sigur ta un noticia grandi pa famia Croes, como cu ta pone un fin na casi 7 aña di persecucion y pesadia. Tanto e casa Paul Croes como Melony mes tabata sospechoso den e caso Ibis. A condena ambos den Corte di Prome Instancia pero den apelacion Melony a sali liber. Procurador General no a keda satisfecho cu e decision di e tres huesnan y a opta pa apela den casacion. Pero a opta awe pa laga e caso cay y no persigui Croes-Paesch mas.
Pues, por conclui cu Ministerio Publico a “trek in” e caso contra Melony Croes-Paesch despues cu tres hues a declar’e liber di labamento di placa.
“Finalmente nos ta yega na fin di un proceso doloroso y pisa. Danki na nos creador”, asina Melony Croes-Paesch a riba Facebook ora el a publica su mesun potret na rudia den misa.
