Secretario di Estado Knops den palabranan cla a ordena Sint Maarten pa hala aden e obligatielening cu nan a habri riba mercado local. Sint Maarten inmediatamente a bay di acuerdo tambe. No por a sinti mucho reaccion positivo tampoco pa presta Gobierno placa, 75 miyon florin. Pero a cera e proceso tambe.
Knops a recorda Ardwell Irion cu riba 21 di october ta vence un “bullet lening” di 50 miyon florin cu Hulanda a presta Sint Maarten y mester pague. A rechasa un peticion di Sint Maarten pa refinanciamento di e suma aki.
Pero si Secretario di Estado a informa cu nan ta dispuesto pa duna Sint Maarten 4 siman mas pa evita cu Gobierno ta bay den “default”. No tin placa pa cumpli, ni pa lo basico manera pago di salario di ambtenaarnan.
E cuatro siman ta duna Sint Maarten chens tambe pa yega na un acuerdo cu Hulanda pa loke ta e di dos tranche di prestamo pa ayudo di likides y na mesun momento ta habri caminda pa combersacionnan relaciona cu e di tres tranche. Knops a bisa cu esey tambe ta crea espacio pa solucionnan di largo plaso pa prestamonan cu venciendo. E proposicion aki ta cay afo si Sint Maarten no para e procedura di busca prestamo localmente.
Mirando cu Irion a para e prestamo, esaki ta nifica cu ta habri caminda pa combersacionnan pa e di dos y di tranche di ayudo di likides.
